މޮނީޓަރިންގ ހާލަތުގައި ހުރި ތަންތަނުން މަގު މައްޗަށް ކުނި ނުނެރުމަށް އެދެން: ވެމްކޯ
5 މެއި 2020 | އަންގާރަ 06:32ކަރަންޓީން އަދި މޮނީޓަރިން ހާލަތުގައި ގެނެސްފައިވާ ގޭތަކުން މަގުމައްޗަށް ކުނި ނެނެރުމަށް ވެމްކޯއިން އެދޭ
ވެމްކޯގެ މުވައްޒަފުން ކުނި ނެގުމުގައި
ކޮވިޑް-19 އާ ގުޅިގެން މާލެ ޞަރަޙައްދުގައި ކަރަންޓީން އަދި މޮނީޓަރިންގގެ ޙާލަތަށް ގެނެވޭ ގެތައް ނުވަތަ އެޕާޓްމަންޓްތަކުން ކުނި މަގުމަށްޗަށް ނުނެރުމަށާއި، އެތަންތަނުން ކުނި ނެގުމަށް ވެމްކޯގެ ޚާއްޞަ ޓީމެއް ދާނެކަމަށް ވެކްކޯއިން ބުނެފިއެވެ.
ރާއްޖެޓީވީން ގެނެސްދޭ ކޮވިޑް-19 ކަވަރޭޖްގައި ފޯނުން މައުލޫމާތު ދެއްވަމުން ވެމްކޯގެ މެނޭޖިންގ ޑިރެކްޓަރ އާދަމް މުހައްމަދު ވިދާޅުވީ، ކަރަންޓީން އަދި މޮނީޓަރިންގ ހާލަތަށް ގެނެސްފައިވާ ބައެއް ގޭގެއިން ނުވަތަ އެޕާޓްމަންޓްތަކުން ބޭރަށް ކުނި ނެރެމުންދާ ކަމަށާއި، އެކަން އެގޮތަށް ނުކުރުމަށް އެދިލައްވާ ކަމަށެވެ. އާދަމް މުހައްމަދު ވިދާޅުވީ މޮނީޓަރިން ހާލަތަށް ގެނެސްފައިވާ ގޭތަކުގެ ކުނި ބައެއް ފަހަރު "ޕޮލިސް ލައިން" ބޭރަށް ވެސް ނެރެފައި ހުންނަ ކަމަށެވެ.
ވެމްކޯއިން މީގެކުރިން ތަކުރާރުކޮށް ބުނަމުން ދިޔައީ، ކަރަންޓީނު އަދި މޮނީޓަރިން ހާލަތަށް ގެނެވޭ ގޭތަކުން ކުނި މަގުމަށްޗަށް ނުނެރެ، ގޭގައި ނުވަތަ އެޕާޓްމަންޓްގައި ބެހެއްޓުމަށް އެދިފައެވެ.އަދި އެކުންފުނިގެ ޚާއްޞަ ޓީމަކުން އެ ގެއަކަށް ގޮސް ކުނި ނަގާނެ ކަމަށްވެސް މީގެކުރިން ދިޔައީ ބުނަމުން ނެވެ.
އާދަމް މުހައްމަދު ވިދާޅުވީ، މޮނީޓަރިން ހާލަތަށް ގިނަ ގެތަކެއް ގެނެވޭއިރު، ކުނިނެގުމުގައި ދަތިތަކެއް ހުރިނަމަވެސް ކޮންމެ ދުވަހަކު އެއްފަހަރު އެގެއަކުން ކުނި ނުނެގުނުނަމަވެސް ދެ ދުވަހުގެ ތެރޭގައި ކުނި ނެގެމުންދާނެ ކަމަށެވެ. އަދި ކުނި ނުނެގޭނަމަ، އެކަން ވެމްކޯއަށް ގުޅާލުމުން ކުނި ނެގުމުގެ މަސައްކަތް އެވަގުތުން ފެށިގެން ކުރިއަށްދާނެ ކަމަށެވެ. އެހެންނަމެވެސް ކަރަންޓީން އަދި މޮނީޓަރިން ހާލަތަށް ގެނެވޭ އެއްވެސް ގެއަކުން މަގުމައްޗަށް ކުނި ނުނެރުމަށް ވަރަށް ބޮޑަށް އެދޭ ކަމަށް ވެސް އާދަމް މުހައްމަދު ވިދާޅުވި އެވެ.
މާލެ ސަރަހައްދު ލޮކްޑައުންކޮށްފައިވާތީ، ވެމްކޯއިން ވަނީ ގޭގެގައި އުކާލާ ކުނި ރަނގަޅަށް ބަންދުކުރުމަށް ފަހު ކޮންމެ ދުވަހެއްގެވެސް މެންދުރު 12:00 އާ 2:00 އާ ދެމެދު ގޭގެ ތިރިއަށް ބޭލުމަށް އެދިފައެވެ. އަދި މަގުމަތީގައި ކުނި ބަހައްޓާއިރު، މަގުގައި ދުއްވާ އެއްޗެއްސަށާއި ހިނގާ މީހުންނަށް ދަތި ނުވާގޮތަށް މަގުމަތީގައި އެއްފަރާތުގައި ބެހެއްޓުމަށް ވެސް ވެމްކޯއިން އެދެފައިވެއެވެ.
ވެމްކޯ އިން ބުނެފައިވާގޮތުގައި، އެކުންފުނީގެ ކޯލް ސެންޓަރު (1666)ގެ ހިދުމަތް ހެނދުނު 10 ން ހަވީރު 4 އާ ހަމައަށް ލިބެމުންދާނެ ކަމަށެވެ.
