"ޓްވައިލައިޓް" ސީރީޒްގެ ފަސްވަނަ ފޮތް ނެރެނީ: އެޑްވަރޑް ކަލެންގެ ނަޒަރުން "މިޑްނައިޓް ސަން"

މަޝްހޫރު ވާހަކަ ސީރީޒްކަމަށްވާ "ޓްވައިލައިޓް" ސީރީޒްގެ އާ ފޮތެއް މި އަހަރު ރިލީޒްކުރުމަށް ނިންމައިފިއެވެ.

ސްޓެފަނީ މެޔަރޒްގެ މި ވެމްޕަޔަރ ސީރީޒްގެ ފަސްވަނަ ފޮތް "މިޑްނައިޓް ސަން" ރިލީޒް ކުރަން ހަމަޖެހިފައިވަނީ އޮގަސްޓް މަހުގެ ހަތަރު ވަނަ ދުވަހުއެވެ.

ސެޓްފަނީ ބުނެފައިވަނީ ދުނިޔޭގެ މިވަގުތުގެ ހާލަތަށް ބަލާފައި ފޮތް ރިލީޒްކުރުން ލަސް ކުރަން ވިސްނިކަމަށެވެ. ނަމަވެސް ލަސް ނުކުރާން ނިންމީ މި ދުވަސް ކޮޅު މިދަފަ "ޑިސްޓްރެކްޝަން" އެއް އެންމެންވެސް ބޭނުންވާނެތީ ކަމަށެވެ.

މި ވެމްޕަޔަރ ސީރީޒްގެ ހަތަރު ފޮތެއް – ޓްވައިލައިޓް، ނިއު މޫން، އެކްލިޕްސް އަދި ބްރޭކިންގ ޑޯން - މިހާތަނަށް ރިލީޒްކޮށްފައިވާއިރު، އެންމެ ފަހު ފޮތް ނެރެފައިވަނީ 2008 ވަނަ އަހަރެވެ.

އަދި ހަމަ އެ އަހަރު ސްޓެފަނީ ވަނީ ފަސް ވަނަ ފޮތެއްގެ މަސައްކަތް ފަށާފައިވާކަން ހާމަކޮށްފައެވެ. ނަމަވެސް ފޮތުގެ 12 ޗެޕްޓަރ ލީކްވުމާ ގުޅިގެން އޭނާ ވަނީ މަސައްކަތް ހުއްޓާލާފައެވެ.

"ޓްވައިލައިޓް" ސީރީޒްގެ ކުރީގެ ފޮތްތައް ލިޔެފައިވަނީ ބެލާ ތޯންގެ ނަޒަރުންނެވެ. މި ވާހަކަތަކަކީ ވެމްޕަޔަރ ސީރީޒްއެއް ނަމަވެސް ބެލާއަކީ އިންސާނެކެވެ. "މިޑްނައިޓް ސަން" ލިޔެފައިވަނީ ފޮތުގެ މައި ރޯލްކަމަށްވާ ވެމްޕަޔަރ، އެޑްވަރޑް ކަލެންގެ ނަޒަރުންނެވެ.

އެހެންކަމުން އޭނާއާއި ބެލާއާ ދިމާވާ ގޮތާއި ދެ މީހުންގެ ގުޅުން ބަދަހިވެގެންދާ ގޮތާއި ވެމްޕަޔަރ އަކާއި އިންސާނެއްގެ ލޯބީގައި ދިމާވާ ގޮންޖެހުންތައް އެޑްވާޑްގެ ނަޒަރުން ކިޔާލުމަށް ފޭނުންނަށް ފުރުސަތު ލިބިގެންދާނެއެވެ.

ޔަންގް އެޑަލްޓުންނަށް ޓާގެޓްކޮށްފައިވާ މި ސީރީޒްގެ ފުރަތަމަ ފޮތް "ޓްވައިލައިޓް" ރިލީޒްކޮށްފައިވަނީ 2005 ވަނަ އަހަރެވެ. އަދި މި ފޮތަށް ބިނާކޮށް ތައްޔާރު ކުރި ފުރަތަމަ ފިލްމް 2008 ވަނަ އަހަރު ރިލީޒްކޮށްފައިވާއިރު، މި ހަތަރު ފޮތަށް މުޅިއަކު ފަސް ފިލްމް ނެރެފައިވެއެވެ. ފޮތްތަކުގެ ނަން ފިލްމްތަކަށް ވެސް ދީފައިވާއިރު، ފަހު ފޮތް "ބްރޭކިންގ ޑޯން"ގެ ފިލްމް ތައްޔާރުކޮށްފައިވަނީ ދެ ބަޔަކަށް ބަހާލައިގެންނެވެ.

މި ފޮތްތަކާއި ފިލްމްތަކުގެ ބޮޑު ފޭންބޭސްއެއް އޮންނައިރު، "ދަ ޓްވައިލައިޓް ސާގާ"ގެ ފިލްމްތައް ބޮކްސް އޮފީހުގައި ވެސް ވަރަށް ކާމިޔާބެވެ.

"ޓްވައިލައިޓް"ގެ ފޮތްތަކަށް ގިނަ އިނާމް ލިބިފައިވާއިރު، ނޮވެމްބަރ 2011 އާ ހަމައަށް އޭގެ 120 މިލިއަން ކޮޕީވަނީ ވިކިފައެވެ.