ޝަލަބީގެ ދެވަނަ މަދަހަ އަލްބަމް ކަމަށްވާ "ހިދާއީ ނޫރު" މިއަދު ހަވީރު ނެރޭނެ ކަމަށް އޭނާގެ މެނޭޖަރު ޝަފީގް އަލީ (ސައްޕެ) ބުނެފިއެވެ.
ސައްޕެ ރާއްޖެއްމްވީއަށް ބުނީ މި އަލްބަމަކީ ޝަލަބީ އާއި ހައުސްއޮފް މިއުޒިކާ ގުޅިގެން ނެރޭ އަލްބަމެއް ކަމަށެވެ. މިދިޔަ އަހަރު ވެސް ޝަލަބީގެ "ހިދާއީ ނޫރު" ގެ ފުރަތަމަ ސީޑީ ވަނީ އާންމުންނާ ހަމައަށް ގެނެސްފައެވެ.
ޝަލަބީގެ މިފަހަރުގެ މަދަހަ ސީޑީއަށް ރާގު ހަދާފައިވަނީ އޭނާއެވެ. އަދި ލަވަތައް ހައްދަވާފައި ވަނީ އާދަމް ނަސީރު އިބްރާހިމް އާއި ނަސްމާ އަބްދުލް މުހުސިނެވެ.
ސައްޕެ ބުނީ މަދަހަ ސީޑީ ނެރޭ ކޮންމެ ފަހަރަކު ވެސް ހިލޭ ސާބަހަށް މަސައްކަތް ކުރާ ޖަމާއަތަކަށް ޝަލަބީ އެހީވާ ކަމަށެވެ. އެގޮތުން މިއަހަރު ތެލެސީމީއާ ކުދިންގެ ތެރެއިން 20 ކުއްޖަކަށް "ތެލަސެޓް" (ލޭއަޅާއިރު ބޭނުންކުރާ ކަށި ސެޓް) ހަދިޔާ ކުރާނެ ކަމަށެވެ.
މިދިޔަ އަހަރު ޝަލަބީ ވަނީ އޭނާގެ ހަރަދުގައި ކެއާ ސޮސަޓީގެ ނުކުޅެދުންތެރިކަން ހުންނަ ކުއްޖަކަށް އެއް އަހަރުގެ ކިޔެވުމުގެ ހަރަދު ވެސް ދީފަ އެވެ.
