ލޮކްޑައުންގެ ވަގުތު ބޭރުގައި އުޅެގެން 6 މީހަކު ފުލުހުންގެ ބެލުމުގެ ދަށަށް ގެންގޮސްފި
4 މެއި 2020 | ހޯމަ 17:36މާލެ ސަރަޙައްދު ވަނީ ލޮކްޑައުން ކޮށްފައި
މާލެ ސަރަޙައްދު ލޮކްޑައުން ކުރުމާ ގުޅިގެން ފުލުހުން ދަނީ މަގުތައް ބަލަހައްޓަމުން
މާލެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ލޮކްޑައުން ކުރެވިފައިވާއިރު، ގަވާއިދާ ޚިލާފަށް މަގުމަމައްޗަށް ނުކުތް 6 މީހަކު ފުލުހުންގެ ބެލުމުގެ ދަށަށް ގެނެސްފިއެވެ.
ހޯމަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ބޭރުތެރޭގައި އުޅުމަށް ދޫކުރާ ފާސް ނެތި ބޭރުގައި އުޅުނު 6 މީހަކު ހޯމަ ދުވަހު ފުލުހުންގެ ބެލުމުގެ ދަށަށް ގެންދެވިފައިވާ ކަމަަށެވެ.
އޭގެ އިތުރުން، ޤަވާއިދާ ޚިލާފަށް ބޭރުގައި އުޅުމުގެ ސަބަބުން މިހާތަނަށް ޖުމުލަ 139 މީހަކު ހައްޔަރުކޮށްފައިވާކަމަށް ފުލުހުންނާ ޙަވާލާދީ މަބްރޫކު ވިދާޅުވިއެވެ.
ކޮމިއުނިޓީ ސްޕްރެޑެއް ފެނި މާލެ ސަރަޙައްދު ލޮކްޑައުން ކޮށްފައިވާއިރު މަގުމަށްޗަށް ނިކުންނަ ފަރާތްތައް 1000 ރުފިޔާއިން ޖޫރިމަނާ ކުރެވެމުންދާނެ ކަމަށް ފުލުހުން ވަނީ ބުނެފައެވެ. ލޮކްޑައުން ކޮށްފައިވާއިރު، ޒަރޫރީ ބޭނުންތަކުގައި ގެއިން ބޭރަށް ނިކުންނަ ފަރާތްތަކަށް ފުލުހުން އަންނަނީ ފާސްތަކެއްވެސް ދޫކުރަމުންނެވެ. އެގޮތުން ވިޔަފާރި ކުރުމަށާއި، އެހެނިހެން ބޭނުންތަކުގައި ގެއިން ބޭރަށް ނިކުތުމުގެ ހުއްދަ ދެނީ ކޮންމެ ގެއަކުން އެކަކަށް އެއް ގަޑިއިރުއެވެ.
ނަމަވެސް ފާއިތުވި ދުވަސްތަކުގައިވެސް ފާސް ނެތި ބޭރުގައި އުޅުމުގެ ސަބަބުން ގިނަ ބަޔަކު ޖޫރިމަނާ ކުރެވި ފުލުހުންގެ ބެލުމުގެ ދަށަށް ގެންދެވިފައިވެއެވެ.
