ރާއްޖެއިން ކޮވިޑް-19 ޖެހުނު މީހުންގެ އަދަދު 541 އަށް އަރައިފި އެވެ.

މިކަން އިއުލާންކުރެއްވީ، ކޮވިޑް-19 އާއި ގުޅިގެން ރާއްޖެއިން މިހާރު އަޅަމުންދާ ފިޔަވަޅުތަކާއި ބެހޭގޮތުން ގައުމާ މުހާތަބް ކުރައްވާ ވާހަކަ ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެވެ.

ރާއްޖެއިން ކޮވިޑް-19 ފެނުނު ފަހުން، އެބަލި ޖެހިފައިވާ މީހުންގެ ތެރޭގައި ހިމެނެނީ 185 ދިވެހިންނާއި 356 ބިދޭސީންނެވެ. އަދި މިހާރު އެ ބައްޔަށް ފަރުވާ ހޯދަމުން އަންނަ 523 މީހުންގެ ތެރެއިން، ވަރަށް މަދު މީހެއް ފިޔަވައި، އެންމެންގެ ހާލު ރަނގަޅުކަމަށް ރައީސް ވިދާޅުވި އެވެ.

ކޮވިޑަށް ޝައްކުކުރެވޭ އެއްވެސް ޢަލާމާތެއް ފެނިއްޖެ ނަމަ، ލަސް ނުކުރައްވައި، ކަމާ ބެހޭ ފަރާތްތަކަށް އެންގެވުމަށް ހުރިހާ ސިއްހީ މާހިރުންވެސް އިރުޝާދުދެއްވަ އެވެ.