މުވައްޒަފުންނާއި ގައިދީންގެ ސަލާމަތަށް ކަރެކްޝަނުން ފިޔަވަޅުތަކެއް އަޅައިފި
4 މެއި 2020 | ހޯމަ 11:51ޖަލުތަކުގައި ޙުކުމް ތަންފީޒުކުރަމުންދާ 105 މީހަކަށް އަދަބު ލުއިކޮށްދީފައިވޭ
އެޗްޕީއޭއިން ކުރިއަށް ގެންދިޔަ ތަމްރީނު ޕްރޮގްރާމްގެ ތެރެއިން
މޯލްޑިވްސް ކަރެކްޝަންސް ސަރވިސްގެ ބެލުމުގެ ދަށުގައި ތިބި ފަރާތްތަކާއި އެ ސަރވިސްގެ މުވައްޒަފުންގެ ރައްކާތެރިކަން ކަށަވަރުކުރުމަށް ފިޔަވަޅުތަކެއް އަޅައިފި އެވެ.
ކޮވިޑް-19 ގެ ސަބަބުން ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާނުކޮށްފައިވާއިރު, ކަރެކްޝަންސް އިން ވަނީ ގިނަ ފިޔަވަޅުތަކެއް އަޅާފަ އެވެ. އެގޮތުން ކަރެކްޝަނަލް ސަރވިސް އިން ވަނީ މިކަމަށް ހާއްސަ ޓާސްކް ފޯސްއެއް އެކުލަވާލާފަ އެވެ. އަދި ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ގައިޑްލައިންތަކާއި އެއްގޮތަށް އެސްއޯޕީތަކެއް އެކުލަވާލާފައިވާ ކަމަށެވެ.
މީގެއިތުރުން، ޖަލުތަކުގެ ތޮއްޖެހުން ކުޑަކުރުމަށްޓަކައި ޖަލުތަކުގައި ޙުކުމް ތަންފީޒުކުރަމުންދާ 105 މީހަކަށް ރައިސުލްޖުމްހޫރިއްޔާ ވަނީ އަދަބު ލުއިކޮށްދެއްވުމަށް ނިންމަވާފަ އެވެ. މިގޮތަށް ނިންމެވީ އޭޕްރިލް މަހުގެ 15 ވަނަ ދުވަހު އެވެ. އަދި ހުޅުމާލެ ޑިޓެންޝަން ސެންޓަރުގައި ތިބި 25 ބިދޭސީން އަނބުރާ ގައުމަށް ފޮނުވާލެނު ކަމަށް ކަރެކްޝަންސް އިން ބުންޏެވެ.
ކަރެކްޝަންސް އިން ބުނީ ކޮންމެ ދުވަހަކުވެސް ކޮވިޑް-19ގެ އަލާމާތްތަކަށް ބެލުމުގެ ދަށުގައި ތިބި ފަރާތްތައް ސްކްރީން ކުރާ ކަމަށެވެ. އަދި އެއްވެސް އަލާމާތެއް ހުރި ކަމަށް ފާހަގަވެއްޖެނަމަ، ވަގުތުން އެކަހެރިކޮށް، ސިއްހީ ފަރުވާދެވޭ ކަމަށެވެ. ކަރެކްޝަންސް ގެ ބެލުމުގެ ދަށުގައި ތިބި ފަރާތްތަކުގެ އިތުރުން، ޖަލުގެ މުވައްޒަފުންވެސް ސްކްރީން ކުރެވޭ ކަމަށް ކަރެކްޝަންސް އިން ބުންޏެވެ.
އަދި ކޮވިޑް-19 އިން ރައްކާތެރިވުމަށް އަޅަން ޖެހޭ ފިޔަވަޅުތަކާއި އެއްވެސް ފަރާތެއްގެ ގައިން ބަލީގެ އަލާމާތެއް ފެނިއްޖެ ހާލަތެއްގައި އަޅަންޖެހޭ ފިޔަވަޅުތަކާއި އެއްވެސް ފަރާތެއް އެ ވައިރަހަށް ޕޮޒިޓިވްވެއްޖެ ހާލަތުގައި އަޅަންޖެހޭ ފިޔަވަޅުތަކާއި ގުޅިގެން ޖަލުގައި ސިއްހީ ފަރުވާ ފޯރުކޮށްދޭން ތިބި ފަރާތްތަކަށް ތަމްރީން ދެވިފައިވާ ކަމަށް ވެސް އެ ސަރވިސް އިން ބުންޏެވެ.
އަދި މުވައްޒަފުންނަށް އެ ފަރާތްތަކަށް މާސްކާއި އަންގީގެ އިތުރުން، ސައިބޯނި ވެސް ފޯރުކޮށްދީފައިވާނެ ކަމަށެވެ.
ކޮވިޑް-19 އިން ރައްކާތެރިވުމުގެ ގޮތުން މާފުށީ ޖަލުގެ އޮފިސަރުން މިއަދު އެ ޖަލު ސާފުކުރުމާއި ޑިސްއިންފެކްޓްކުރުމުގެ އިތުރުން މާލެ ފުރަބަންދު ކުރުމާ ގުޅިގެން ޢާއިލާ ތަކުގެ ފަރާތުން ޖަލުތަކުގައި ތިބި ޤައިދީންނަށާއި ބަންދުމީހުންނަށް އޮންލައިންކޮށް ފައިސާ ފޮނުވޭނެ އިންތިޒާމް ވެސް ކަރެކްޝަންސް އިން ވަނީ ހަމަޖައްސާފަ އެވެ. އަދި ވީޑިއޯ ކޯލް މެދުވެރިކޮށް ޢާއިލާއާ ބައްދަލުކުރުމުގެ އިންތިޒާމުވެސް ހަމަޖައްސައިީފައިވާނެ ކަމަށް ކަރެކްޝަންސް އިން ބުންޏެވެ.
