ވެންޓިލޭޓަރުތަކާއި ބޭރުގައި ތިބި ދިވެހިން ގެނައުމުގައި ކޮރަޕްޝަން ހިންގިކަމަށްބުނާ މައްސަލަ ތަހުގީގު ކުރަނީ

ދުނިޔޭގައި ހަލުވިކަމާއެކު ފެތުރެމުންދާ އަދި މިހާރު ރާއްޖޭގައި ވެސް ފެތުރެމުންދާ ކޮވިޑް-19 އާ ގުޅިގެން ސަރުކާރުން ޢަމަލުކޮށްފައިވާ ގޮތާގުޅޭ، 5 މައްސަލައެއް އެންޓި ކޮރަޕްޝަން ކޮމިޝަން (އޭސީސީ)އިން ބަލަމުންދާ ކަމަށް އެކޮމިޝަނުން ބުނެފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީން އާދިއްތަ ދުވަހުގެ ރޭ ބޭއްވި ބައްދަލުވުމުގައި އޭސީސީގެ ރައީސް މަރިޔަމް ޝިއުނާ ވިދާޅުވީ، ކޮވިޑް-19 އާގުޅިގެން ސަރުކާރުން ކުރިއަށް ގެންދާ ކަންތައްތަކާ ގުޅިގެން އެކޮމިޝަނުން 5 މައްސަލައެއް ބަލަމުންދާ ކަމަށާއި، އޭގެ ތެރެއިން ދެމައްސަލަ އަމިއްލަ ފަރާތަކުން ހުށަހެޅިއިރު، އަނެއް ތިން މައްސަލައަކީ އެކޮމިޝަނަށް ފާހަގަކުރެވިގެން ބަލަމުންދާ މައްސަލަތަކެއް ކަމަށެވެ.

Advertisement

އަމިއްލަ ފަރާތްތަކުން ހުށަހެޅި ދެ ޝަކުވާތަކުގެ މައްސަލައިގެ ތަފުޞީލު ޝިއުނާ ހާމަނުކުރެއްވިނަމަވެސް، އޭސީސީއަށް ފާހަގަކުރެވިގެން ބަލަމުންދާ ތިން މައްސަލައިގެ ތަފުޞީލު ޝިއުނާ ވިދާޅުވެ ދެއްވިއެވެ.

އޭގެ ތެރެއިން އެއްމައްސަލައަކީ، ކޮވިޑް19 އާއި ގުޅިގެން ސަރުކާރުން ގެނައުމަށް ނިންމާފައިވާ ވެންޓިލޭޓަރުތަކާއި ގުޅޭ މައްސަލާގައި ކޮރަޕްޝަނަށް މަގުފަހިވާ ގޮތަށް ހެލްތު މިނިސްޓްރީން ޢަމަލު ކޮށްފައިވާ ކަމަށް ބުނާ މައްސަލައެވެ. މިމައްސަލާގައި ޝިއުނާ ވިދާޅުވީ، ވެންޓިލޭޓަރުތައް ގަތުމަށް ބަޔަކާ ޙަވާލުކުރުމުގައި ކޮރަޕްޝަން ހިމެނޭކަަމަށް ބުނާ މައްސަލައެއް ތަޙުޤީޤު ކުރިޔަށްދާ ކަމަށެވެ. އަދި ކޮވިޑް-19 އާގުޅިގެން ހޯދަންޖެހޭ ބައެއްތަކެތި ގަތުމުގައި، ވަކި ފަރާތަކަށް ނާޖާއިޒު ފައިދާ ލިބޭ ގޮތަށް ތަކެތި ގަތުމާއި ޚިދުމަތްދިނުމަށް ޕްރޮކިއުމެންޓްގެ އުޞޫލާ ޚިލާފަށް ކަންތައްތަކެއް ކުރަމުންގެންދާ މައްސަލަ އެއްވެސް ހިމެނޭ ކަމަށް ޝިއުނާ ވިދާޅުވިއެވެ.

އޭސީސީން ތިން ވަނަ މައްސަލައެއްގެ ގޮތުގައި ބަލަމުންދަނީ ކޮވިޑް-19 ގެ މިޙާލަތުގައި، ރާއްޖޭން ބޭރުގައި ތިބި ދިވެހިން މޯލްޑިވިއަނުން ރާއްޖެ ގެނައުމުގައި، އިސްކަންދޭ ފަރާތްތައް ކަނޑައަޅާއިރު ދައުލަތުގެ އިސްވެރިންގެ ނުފޫޒު ބޭނުންކޮށްގެން އެފަދަ ފަރާތްތަކުގެ ޢާއިލާތަކާއި ރައްޓެހިންނާއި ގުޅުން އޮންނަ ފަރާތްތަކަށް އިސްކަންދީފައިވާ ކަމަށް ބުނާ މައްސަލައެއް ކަމަށްވެސް ޝިއުނާ ވިދާޅުވިއެވެ.

ޝިއުނާ ވިދާޅުވީ، ފުރަބަންދުގެ މިޙާލަތުގައި، އޮފީސްތައް ބަންދުކޮށްފައިވާތީ، މިމައްސަލަތައް ތަޙުޤީޤު ކުރުމަށް ބޭނުންވާ ބައެއް ލިޔެކިޔުންތައް ހޯދުމާއި ސުވާލު ކުރަންޖެހޭ މީހުންނާ ސުވާލު ކުރުމަށް ގޮންޖެހުންތަކެއް ކުރިމަތިވެފައިވާ ކަމަށެވެ. އެހެންކަމުން މިމައްސަލަތައް ތަޙުޤީޤު ކުރުމުގައި ލަސްތަކެއް ވަމުންދާކަމަށް ޝިއުނާ ވިދާޅުވިއެވެ.

ވެންޓިލޭޓަރުތަކުގެ މައްސަލާގައި ރައްޔިތުންގެ މަޖިލީހުގެ ބައެއް މެންބަރުން ސުވާލު އުފައްދަވާފައިވާއިރު، ނޭޝަނަލް އިމަރޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުންތަކުގައި ވެންޓިލޭޓަރުކާގުޅޭ ގޮތުން ކަމާބެހޭ ފަރާތްތަކުން ތަފާތުގޮތްގޮތަށް ވާހަކަ ދައްކަވާފައި ވެއެވެ.