ފުލުހުންނަށް އިންޒާރުދީ، ފުލުހުންގެ މުދަލަށް ގެއްލުންދިން މައްސަލައިގައި 7 މީހަކު ހައްޔަރުކޮށްފި
ހައްޔަރު ކޮށްފައިވަނީ ދިވެހި ފިރިހެނުން
އދ. ފެންފުށި
ފުލުހުންނަށް އިންޒާރުދީ ފުލުހުންގެ މުދަލަށް ގެއްލުންދިން މައްސަލައެއްގައި އދ. ފެންފުށިން ހަތް މީހަކު ހައްޔަރު ކޮށްފިއެވެ.
ފުލުހުން ބުނީ މިހިނގާ މެއި މަހުގެ ދެވަނަ ދުވަހުގެ ރޭ 11:30 ހާއިރު ފެންފުށީގައި ހަތް މީހުންގެ ގްރޫޕަކުން ފުލުހުންނަށް އިންޒާރުދީ ފުލުހުންގެ މުދަލަށް ގެއްލުންދީ ފުލުހުންނަށް ބިރުދެއްކި މައްސަލައިގައި ހޮނހިރު ދުވަހުގެ ރޭ އެތަނުން އެކަކު ހައްޔަރުކޮށް، އާދިއްތަ ދުވަހު ކޯޓު އަމުރެއްގެދަށުން އަނެއް ހަމީހުން ހައްޔަރުކޮށްފައިވާ ކަމަށެވެ.
ހައްޔަރުކޮށްފައިވަނީ އުމުރުން 26 އަހަރާއި، 34 އަހަރާއި، 37 އަހަރާއި، 32 އަހަރާއި، 31 އަހަރާއި، 22 އަހަރާއި އަދި 27 އަހަރުގެ ދިވެހި ފިރުހެނުންނެވެ.
މި ހާދިސާ ހިނގަން މެދުވެރިވެފައިވަނީ ފެންފުށީގައި މަސްތުވާތެކެތި ބޭނުންކުރާ ބަޔަކު މަގުމަތިން ހުއްޓުވައި ޗެކްކުރުން ގިނަވުމާއި، މާލެ ނުވަތަ އެހެން ރަށަކުން ފެންފުއްޓަށް ގެންދާ ފޮށިގަނޑުތަކުގެ ތެރޭގައި އެމީހުންނަށް ނިސްބަތްވާތަކެތި މާގިނައިން ޗެކް ކުރާ ކަމަށް ބުނެ އެކަމާއި ހިތްހަަމަނުޖެހިގެންނެވެ. އަދި އެމީހުންވަނީ ޕޮލިސް ސްޓޭޝަން ދޮށަށް އެއްވެ ބިރުދައްކާ މުދަލަށް ގެއްލުން (ސްޓޭޝަން ދޮރު ހަލާކު ކޮށްލުމުގެ) ދީފައި ކަމަށް ފުލުހުން ބުންޏެވެ.
މި މައްސަލައިގައި މި ހަތް މީހުންގެ ބަންދާމެދު ގޮތެއް ނިންމުމަށް އާދިއްތަ ދުވަހު އދ. އޮމަދޫ މެޖިސްޓްރޭޓް ކޯޓަށް ގެންދިއުމުން ކޯޓުން ވަނީ ދެމީހަކަށް ފަސްދުވަހުގެ މުއްދަތު ޖަހާފައެވެ. އަދި ފަސް މީހަކަށް ދިހަ ދުވަހުގެ މުއްދަތު ދީފައި ކަމަށް ފުލުހުން ބުންޏެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ.
