ޓްރަމްޕަށް ވައިރަހެއް އުޅޭކަން އެނގިވަޑައިގެންނެވީ އެމެރިކާގައި ފެތުރެންފެށި ފަހުންތަ؟
4 މެއި 2020 | ހޯމަ 03:18އޭގެ ތިން ދުވަސް ކުރިން އެމެރިކާއިން ފުރަތަމަ ކޭސް ރިޕޯޓު ކުރި
އެމެރިކާގެ ރައީސް ޑޮނާލްޑް ޓްރަމްޕް
މިހާރު މުޅި ދުނިޔޭގައި ފެތުރެމުންދާ ނޮވެލް ކޮރޯނާވައިރަސްގެ ވާހަކަ އެނގިވަޑައިގެންނެވީ ޖެނުއަރީ މަހުގެ 23 ވަނަ ދުވަހު ކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، އާދީއްތަ ދުވަހު ބޭރުގެ މީޑިއާއެއް ކަމަށްވާ ފޮކްސް ނިއުސްއަށް ދެއްވި ބަސްދީގަތުމެއްގައެވެ.
ޓްރަމްޕް ވިދާޅުވެފައިވަނީ އޭރު އެމެރިކާގެ އިންޓެލިޖެންސް ކޮމިއުނިޓީ ހިނގަމުންދިޔައީ އެންމެ ރަނގަޅަކަށް ނޫން ކަމަށެވެ. އަދި އިންޓެލިޖެންސް އޭޖެންސީތަކުން ހޯމަ ދުވަހު އެކަމާއި ގުޅިގެން ސްޓޭޓްމެންޓެއް ނެރޭނެ ކަމަށެވެ.
ޖެނުއަރީ 23 ވަނަ ދުވަހު އެމަނިކުފާނަށް ވައިރަހެއް ފެތުރިދާނެ ކަމުގެ ބިރު އޮތް ކަމަށް އެނގިވަޑައިގެންނެވި ނަމަވެސް، އޭގެ ތިން ދުވަސް ކުރިން އެމެރިކާއިން ވަނީ އެޤައުމުގެ އެންމެ ފުރަތަމަ ކޮވިޑް-19 ގެ ކޭސް ރިޕޯޓުކޮށްފައެވެ.
ރިޕޯޓުތަކުން ބުނާގޮތުގައި އެމެރިކާގެ ސެކެޓްރީ އޮފް ހެލްތު އެންޑް ހިއުމަން ސަރވިސަސް އެލެކްސް، އަޒާރު ވަނީ ޖެނުއަރީ މަހުގެ 18 ވަނަ ދުވަހު ކޮވިޑް-19ގެ ބިރު އެމެރިކާއަށް އޮތް ކަމަށް ވިދާޅުވެ، ޓްރަމްޕަށް ފޯނުން ގުޅުއްވާ މަޢުލޫމާތު ދެއްވާފައެވެ.
ބޭރުގެ މީޑިއާތަކުން ބުނާގޮތުގައި ރައީސް ޓްރަމްޕަށް އާދައިގެ މަތިން ލިބިވަޑައިގަންނަވާ "އިންޓެލިޖެންސް ބްރީފިންގް" ގައި އެމެރިކާއަށް މި ވައިރަހުގެ ބިރު އޮތްކަމުގެ މަޢުލޫމާތު ޤަވާއިދުން އަރުވައެވެ. އެގޮތުން ޖެނުއަރީ މަހުގެ 3 ވަނަ ދުވަހު މި މައުލޫމާތު އެ ބްރީފިންގައި ހުރި ކަމަށްވެސް ރިޕޯޓުތައް ބުނެއެވެ. ޓްރަމްޕްއަށް އޭރު މި މަޢުލޫމާތު އެނގިވަޑައިނުގެންނެވީ އިންޓެލިޖެންސް ބްރީފިންގްގައި ވިދާޅުވެފައި ނުވުމަކީވެސް އެކަށިގެންވާ ކަމެކެވެ.
އެމެރިކާއަކީ މިހާތަނަށް ކޮވިޑް-19 ގެ އެންމެ ގިނަ ކޭސްތައް ރިޕޯޓުކޮށްފައިވާ ޤައުމެވެ. އެގޮތުން، މިހާތަނަށް 1,188,122 އަށް ވުރެ ގިނަ ކޭސް ވަނީ ރިޕޯޓުކުރެވިފައެވެ. އަދި މި ބަލި ޖެހިގެން އެމެރިކާގައި ވަނީ 68,598 މަރުވެފައެވެ.
