ށ. ނަރުދޫއަށް ބޭނުންވާ ސިއްހީ އާލާތްތައް ހޯމަ ދުވަހު ފޮނުވާނެ: މަބްރޫކް
ޓީމް ދަތުރުކުރެއްވީ ރައީސްގެ އެދިލެއްވުމަކަށް
ނެޝަނަލް އެމަރޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު
ށ. ނަރުދޫއަށް ބޭނުންވާ ޞިއްޙީ އާލާތްތައް ހޯމަ ދުވަހު ފޮނުވާނެ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ ނަރުދޫ އިން ވައިރަސްއަށް ޕޮޒިޓިވްވެފައިވާ 11 ކޭސް ފެނުމާއި ގުޅިގެން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ އެދިވަޑައިގަތުމުގެ މަތިން އެ ރަށަށް ޓީމެއް ދަތުރުކުރައްވާފައިވާ ކަމަށެވެ.
އަދި މި ޓީމުގައި ހެލްތު މިނިސްޓަރާއި ރައީސް އޮފީހުގެ ޗީފް އޮފް ސްޓާފްގެ އިތުރުން ޞިއްޙީ ތަޖުރިބާރާކުންގެ ޓީމު ކަމަށްވާ ޓެކްނިކަލް އެޑްވައިޒަރީ ގްރޫޕް (ޓެގް) ގެ ފަރާތުން ޑރ. ޢަލީ ލަޠީފު ވަޑައިގެންނެވި ކަމަށެވެ.
މަބްރޫކް ވިދާޅުވި މިކަންތައްތައް ކުރެވުނީ އެ ރަށުން ގިނަ ކޭސްތަކެއް ފެނި، ކޮމިއުނިޓީ ސްޕްރެޑެއް އިތުރަށް ފެނިދާނެ ރަށަކަށް ބެލެވޭތީ، އެ ރަށުގައި ރޭވިފައިވާ އިންތިޒާމުތައް ބެލުމުގެ އިތުރުން ތައްޔާރު ކުރެވިފައިވާ ތަންތަން އިންސްޕެކްޓް ކުރުމުގެ ގޮތުން ކަމަށެވެ.
މަބްރޫކް އިތުރަށް ވިދާޅުވީ މި ދަތުރުގައި އެ ރަށުގެ ޓާސްކް ފޯހުގެ ޓީމާއި ބައްދަލުކޮށް ކަންތައްތައް ކުރިއަށް ރާވާނެ ގޮތުގެ މަޝްވަރާ ވެސް ކޮށްފައިވާ ކަމަށެވެ.
ނަރުދޫ އިން މިހާތަނަށް 52 ސާމްޕަލް ނަގާފައިވާއިރު 29 ސާމްޕަލެއްގެ ނަތީޖާ އަދި ނުލިބިއެވެ.
