ކޮންޓެކްޓް ޓްރޭސިންގެ ތެރެއިން 3951 މީހަކު ފާހަގަކުރެވުނު

ރާއްޖޭގައި ކޮވިޑް-19 އަށް ޕޮޒިޓިވްވި މީހުންނާއި އެކި ގޮތްގޮތުން ކޮންޓެކްޓްވި 3951 މީހަކު ފާހަގަކުރެވިފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއޯއީސީ) އިން ބުނެފިއެވެ.

އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ ރާއްޖޭގައި 527 މީހަކު ޕޮޒިޓިވްވެފައިވާ ކަމަށެވެ. އަދި މީގެ ތެރެއިން 506 މީހަކަށް ފަރުވާ ދެމުން އަންނަ ކަމަށެވެ.

Advertisement

މަބްރޫކް ވިދާޅުވީ މިހާތަނަށް 260 ތަނެއް މޮނީޓަރިންގގެ ހާލަތަށް ގެނެސްފައިވާ ކަމަށާއި އައިސޮލޭޝަން ފެސިލިޓީތަކުގައި މިވަގުތު 452 މީހަކު އެބަތިބި ކަމަށެވެ. އަދި ކަރަންޓީންގައި 1547 މީހަކު ކަމަށެވެ.

މިހާތަނަށް 8327 ސާމްޕަލް ނަގާފައިވާއިރު އޭގެ ތެރެއިން 8064 ސާމްޕަލްގެ ނަތީޖާ ނެގެޓިވްވެފައިވާ ކަމަށް ވެސް މަބްރޫކް ވިދާޅުވިއެވެ. އަދި ނަތީޖާ ނުލިބި 151 ސާމްޕަލެއްވާކަމަށް ވެސް އޭނާ ވިދާޅުވިއެވެ.

ކޮންޓެކްޓް ޓްރޭސިންގެ މަސައްކަތުން ފާހަގަވެފައިވާ ބައެއް ކަންތައްތަކަށް އަލިއަޅުއްވާލައްވަމުން ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ އަލަށް ފެނުނު ކޮންޓެކްސްގެ ތެރޭގައި އަލާމަތްތައް ފެނިފައިވަނީ މަދު މީހުންގެ ކަމަށެވެ. އަދި ވައިރަސް ޖެހިފައިވާ އުމުރަށް ބަލާއިރު އުމުރުން 20 އަހަރާއި 40 އަހަރުގެ އުމުރުގެ މީހުން މިހާތަނަށް ޕޮޒިޓިވްވެފައިވާ ކަމަށް ވެސް ޑރ. އަފްޒަލް ވިދާޅުވިއެވެ.

ރާއްޖެއިން މިހާތަނަށް 527 މީހަކު ވައިރަސްއަށް ޕޮޒިޓިވްވެފައިވާއިރު މީގެ ތެރޭގައި 181 ދިވެހިންނާއި 343 ބިދޭސީން ހިމެނެއެވެ.