މަނަދޫގައި ހުންނަ ނ އަތޮޅު ހޮސްޕިޓަލްގައި މަސައްކަތްކުރަމުންދާ 17 ސްޓާފަކު އައިސޮލޭޝަންގައި
3 މެއި 2020 | އާދީއްތަ 19:00އަންހެން މީހާއާއި ކްލޯޒް ކޮންޓެކްޓްވި 4 މީހެއްގެ ސާމްޕަލް ނެގެޓިވް
މަނަދޫގައި ހުންނަ ނ އަތޮޅު ހޮސްޕިޓަލް
ނ. މަނަދޫގެ އަންހެނަކު މާލެ އައުމަށްފަހު ކޮވިޑް-19 އަށް ޕޮޒިޓިވްވުމާއި ގުޅިގެން ކުރިޔަށް ގެންދިޔަ ކޮންޓެކްޓް ޓްރޭސިންގ ގެ ތެރެއިން ފާހަގަކުރެވުނު މީހުން އައިސޮލޭޓްކޮށްފައިވާ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ނ މަނަދޫގެ 80 އަހަރުގެ މީހަކު ޕޮޒިޓިވްވި ކަން އެނގުނީ މިމަހުގެ 1 ވަނަ ދުވަހު އެވެ. ކޮވިޑް-19 އަށް ޕޮޒިޓިވްވިކަން އެނގުނީ ބަލި މީހާގެ ހާލު ބޮޑުވެގެން މިދިޔަ ހަފްތާގެ ބުރާސްފަތި ދުވަހުގެ ރޭ މާލެ ގެނެސް ހުން ހުރުމުން އައިޖީއެމްއެޗުން އެ އަންހެން މީހާ ޓެސްޓް ކުރުމުންނެވެ. މިކަމާއި ގުޅިގެން މައުލޫމާތު ދެއްވަމުން ޑރ އިބްރާހީމް އަފްޒަލް ވިދާޅުވީ އެމީހާއަކީ ކޮވިޑް-19އަށް ޝައްކު ކުރެވިގެން ފަރުވާދިން ބަލިމީހެއް ނޫންކަމަށެވެ.
މިއަންހެން މީހާގެ ކޮންޓެކްޓް ޓްރޭސިންގެ ތެރެއިން 15 މީހަކު އައިސޮލޭޓް ކޮށްފައިވަނީ ސިއްހީ ސަލާމަތްތެރިކަން ކަށަވަރުކުރުމަށްޓަކައި ކަމަށް މަބްރޫކް ވަނީ ވިދާޅުވެފަ އެވެ.
މިކަމާއި ގުޅިގެން "ރާއްޖެ އެމްވީ" އަށް މައުލޫމާތު ދެއްވަމުން ނ އަތޮޅު ހޮސްޕިޓަލްގެ މެނޭޖަރ އިސްމާޢީލް ޝަފީގް ވިދާޅުވީ މިހާތަނަށް އައިއިރު ހޮސްޕިޓަލްގެ 17 ސްޓާފަކު އައިސޮލޭޝަންގައި އެބަތިބި ކަމަށެވެ.
މީގެއިތުރުން ޕޮޒިޓިވްވި އަންހެން މީހާއާއި ކްލޯޒް ކޮންޓެކްޓްވި 4 މީހެއްގެ ސާމްޕަލް ނެގެޓިވްވެފައިވާ ކަމަށް ޝަފީގް ވިދާޅުވި އެވެ.
އިސްމާޢީލް ޝަފީގް ވިދާޅުވީ ހޮސްޕިޓަލްގެ ގިނަ ސްޓާފުންތަކެއް އައިސޮލޭޝަނަށް ދާންޖެހުމާއި ގުޅިގެން ހޮސްޕިޓަލުން މިހާރު ޚިދުމަތް ދެމުންގެންދާނީ 8 ގަޑިއިރު ކަމަށެވެ. ނ އަތޮޅު ހޮސްޕިޓަލަކީ 24 ގަޑިއިރު ޚިދުމަތް ދެމުން އަންނަ ހޮސްޕިޓަލެކެވެ. ނަމަވެސް މިކަމާއި ގުޅިގެން ހޮސްޕިޓަލް ހުޅުވައިގެން ދެން ޚިދުމަތް ދެމުންގެންދާނީ ހެނދުނު 8 ން މެންދުރު 2 ށް ކަމަށް އިސްމާޢީލް ޝަފީގް ވިދާޅުވިއެވެ. އަދި އެހެން ގަޑިތަކުގައި އޮންކޯލްގައި ސްޓާފުން ތިބޭނެކަމަށް އިސްމާޢީލް ޝަފީގް ވިދާޅުވި އެވެ.
ސްޓާފުންގެ ދަތިކަން ވަކިން ޚާއްސަކޮށް ނަރުހުންގެ ދަތިކަން ދިމާވުމާއެކު ކައިރި ރަށްތަކުންވެސް އެހީތެރިކަން ފޯރުކޮށްދޭކަމަށް ޝަފީގް ވިދާޅުވި އެވެ. އެގޮތުން ޅ އަތޮޅުން ދެ ނަރުހަކު މިހާރު އައިސްފައިވާކަމަށާއި އެހެން ކަމުން ޖުމްލަ މިހާރު ހޮސްޕިޓަލްގައި މަސައްކަތް ކުރަމުންދާނީ 7 ނަރުހުން ކަމަށް އިސްމާޢީލް ޝަފީގް ވިދާޅުވި އެވެ. އަދި ހޮސްޕިޓަލުން ދެމުންގެންދާ ޚިދުމަތްތަކަށް ބުރުއެރުމެއް ނެތި ދެމުން ގެންދާނެކަމަށްވެސް އިސްމާޢީލް ޝަފީގް ވިދާޅުވި އެވެ.
މަނަދޫގެ 80 އަހަރުގެ އަންހެން މީހާ ޕޮޒިޓިވްވުމާއި ގުޅިގެން އެރަށް މިހާރު އޮތީ މޮނިޓަރިންގެ ހާލަތުގަ އެވެ. ރާއްޖެ ޓީވީން ގެންނަމުން އަންނަ ކޮވިޑް-19 ގެ ޚާއްސަ ކަވަރޭޖަށް މައުލޫމާތު ދެއްވަމުން މަނަދޫ ކައުންސިލްގެ ރައީސް މުހައްމަދު އުމަރު ވިދާޅުވީ މޮނިޓަރިންގެ ހާލަތުގައި ގޭގެއަށް ތަކެތި ޑެލިވަރީ ކުރުމާއި ކުނި އުކާލުންފަދަ ކަންކަމުގެ އިންތިޒާމުތައް ރަށުގެ ޓާސްކް ފޯހުގެ ފަރާތުން ހަމަޖައްސާފައިވާ ކަމަށެވެ.
