އެޗްޕީއޭގެ ވެބްސައިޓް ހެކް ކުރުމަކީ ނާތަހުޒީބު، ފިނޑި އަމަލެއް: މިނިސްޓަރު މަލީހު
3 މެއި 2020 | އާދީއްތަ 17:45ތަހުގީގު ކުރުމުގެ މަސައްކަތް ދަނީ ކުރަމުން
ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު
ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ވެބްސައިޓް ހެކް ކުރުމަކީ ނާތަހުޒީބު، ފިނޑި އަމަލެއްކަމަށް ކޮމިއުނިކޭޝަންސް، ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެއެވެ.
އެނޯނިމަސްކަމަށް ބުނާ ބަޔަކު އެޗްޕީއޭގެ ވެބްސައިޓު ހެކްކުރީ އާދިއްތަ ދުވަހުގެ މެންދުރުފަހުގެ ވަގުތެއްގައެވެ.
މިއަމަލު ހަރުކަށި އިބާރާތުން ކުރައްވައި މިނިސްޓަރު މަލީހު ވިދާޅުވީ ތަހުގީގުގެ އިދާރާތައް ގުޅިގެން ތަހުގީގު ކުރުމުގެ މަސައްކަތް ކުރިއަށްދާ ކަމަށެވެ.
ވީޑިއޯގައި ސަރުކާރަށް ވަރުގަދަ އިންޒާރުތަކެއް ދީފައިވާއިރު، ވެރިކަމަށް އައުމަށްފަހު ދިވެހި ރައްޔިތުންގެ ހެވާ ލާބަޔަށް އެއްވެސް ކަމެއް ކޮށްފައި ނުވާކަމަށާއި ވެރިކަމަށް އަންނަންވީ އެއްވެސް ވައުދެއް ފުއްދާފައިނުވާ ކަމަށް ބުނެ އެވެ. މިކަމުގެ ހެއްކަކަށް ކޮވިޑް-19 އާ ގުޅިގެން ސަރުކާރުން އަމަލުކުރި ގޮތުގެ ވާހަކަ އެ ވީޑިއޯގައި ވާހަކަދައްކާ ފަރާތުން ބުނެ އެވެ.
އެގޮތުން އާބާދީގެ 99 އިންސައްތަ މީހުންނަށް އާމްދަނީ ލިބޭ ދޮރުތައް ބަންދުވެފައިވާއިރު، ބޭރުން ލިބޭ އެހީ ބޭނުންކުރަނީ މަހުޖަނުންނަށް (1 ޕަރސެންޓަށް) ކަމަށް ބުނެ އެވެ. އަދި އެދެވޭ ވަރުގެ ބަދަލުތަކެއް ނުފެނިއްޖެނަމަ، ކުރިއަށް އޮތް ތަނުގައި ސަރުކާރުގެ އެހެން ނެޓްވަރކްތައް ހެއްކުރާނެ ކަމުގެ އިންޒާރު ވަނީ ވީޑިއޯގައި ދީފަ އެވެ.
އެޗްޕީއޭގެ ވެބްސައިޓް ހެކް ކުރިކަމުގެ މައުލޫމާތު ލިބުނުތާ ކުޑައިރުކޮޅެއްގެ ތެރޭގައި އެޗްޕީއޭގެ ވެބްސައިޓް މިހާރު ވަނީ ޑައުންވެފައެވެ.
