ހދ. މަކުނުދޫއިން ފުރާގެން އެއަތޮޅު ނޭކުރެންދުއަށް ސިއްރުން އެރި ތިން ޒުވާނަކު ހައްޔަރުކޮށްފިއެވެ.

ފުލުހުން ބުނީ އާދިއްތަ ދުވަހުގެ 2:28 ހާއިރު މަކުނުދޫން ފުރައިގެން ތިން މީހުންނާއެކު އައި ޑިންގީއެއް ހުއްދަ ނެތި ނޭކުރެންދުއަށް ކައިރުކޮށް ސިއްރުން ނޭކުރެއްދުއަށް އެރި މައްސަލައެއްގައި އެ ތިން މީހުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ފުލުހުންނަށް އެމީހުން ފެނުނީ ނޭކުރެންދޫގައި ފުލުހުން ޕެޓްރޯލް ކުރަމުންދަނިކޮށް ރަށުގެ ފުއްޓަރު ފަރާތު ފަޅުތެރެއަށް ޑިންގީ ކައިރިކޮށް ރަށަށް ކައިރިކޮށް ފައިބަނިކޮށް ކަމަށް ފުލުހުންގެ އިދާރާއިން މަޢޫލޫމާތުދެއެވެ. މިމައްސަލާގައި ހައްޔަރު ކޮށްފައިވަނީ އުމުރުން 25 އަހަރުގެ ދިވެހި ދެ ފިރިހެނުންނާއި 32 އަހަރުގެ ފިރިހެނަކުކަމަށާއި، މައްސަލަ އިތުރަށް ތަހުޤީޤުކުރަމުންދާ ކަމަށްވެސް ފުލުހުންގެ އިދާރާއިން ބުނެއެވެ.

ކޮވިޑް19 ރޯގާ ފެތުރުނަ ނުދިނުމަށްޓަކައި ރަށްރަށައް އަރައި ފޭބުން މަނާކޮށްފައި އޮއްވާ ބައެއް މީހުން ދަނީ ޤަވައިދާ ޚިލާފަށް އެކި ރަށްރަށަށް އަރަމުންނެވެ.

ޢާންމު ޞިއްޙަތުގެ ކުއްލި ނުރައްކަލުގެ ޙާލަތު ރާއްޖޭގައި އިޢުލާނު ކޮށްފައިވާއިރު، ޑަރެކްޓަރ ޖެނެރަލް އޮފް ޕަބްލިކް ހެލްތު އަންގާ އެންގުންތަކާ ދެކޮޅު ހަދާނަމަ، ޤާނޫނީ ފިޔަވަޅު އެޅުމުގެ ބާރު ތަންފީޒީ އިދާރާތަކަށް ލިބިގެންވެއެވެ. އެގޮތުން ކަރަންޓީނަށް ދާން ދެކޮޅުހެދުމާއި، ސާމްޕަލް ނެގުމަށް ދެކޮޅުހަދައިފިނަމަ، ކޯޓު ޢަމުރެއްގެ ދަށުން އެކަންކަން ކުރުމުގެ ބާރުވެސް ޤާނޫނުން ލިބިދެއެވެ. މިހާރުވެސް މިފަދަ ބައެއް ފަރާތްތަކާމެދު ސިވިލް ކޯޓުން ޢަމުރުތައް ނެރެފައި ވެއެވެ.