އަރަބި ޤައުމުތަކުން ހަދިޔާކުރި ކަދުރާ ޙަވާލުވުމަށް ކައުންސިލްތަކަށް ފުރުސަތު ހުޅުވާލައިފި
ސަޢޫދީޢަރަބިއްޔާގެ ސަރުކާރުންނާއި، ޔޫއޭއީން ކަދުރު ހަދިޔާކޮށްފައިވޭ
މޭ މަހުގެ 11 ވާ ހޯމަ ދުވަހު 17:00 ގެ ކުރިން މިނިސްޓްރީއަށް އައިސް ކަދުރާ ޙަވާލުވުމަށް އެދިފައިވޭ
ޢަރަބި ޤައުމުތަކުން ރަމަޟާންމަހާ ދިމާކޮށް ފޮނުވާފައިވާ ކަދުރާ ޙަވާލުވުމަށް އިސްލާމިކް މިނިސްޓްރީން ކައުންސިލްތަކަށް ފުރުސަތު ހުޅުވާލައިފިއެވެ.
ހޮނިހިރު ދުވަހު އިސްލާމިކް މިނިސްޓްރީން ނެރުނު އިއުލާނެއްގައި ބުނީ، 1441 ވަނަ އަހަރުގެ ރަމަޟާން މަހު ސަޢޫދީޢަރަބިއްޔާގެ ސަރުކާރުންނާއި، ޔުނައިޓަޑް ޢަރަބް އެމިރޭޓްސްގެ ޚަލީފާ ބިން ޒައިދު އަލް ނަޙްޔާން ފައުންޑޭޝަނުން ރާއްޖެއަށް ކަދުރު ފޮނުވާފައިވާ ކަމަށެވެ.
އޭގެ ތެރެއިން ސައުދީން ފޮނުވާފައިވާ ކަދުރު ޚާއްސަކޮށްފައިވަނީ އާންމު ރައްޔިތުންނަށް ކަމަށާއި، ޔޫއޭއީން ފޮނުވާފައިވާ ކަދުރު ޚާއްސަކޮށްފައިވަނީ ކޮވިޑް-19 އާ ގުޅިގެން ޤާއިމުކޮށްފައިވާ ފެސިލިޓީތަކުގައި އުޅޭ މީހުންނާއި، ޙާލުގައި ޖެހިފައިވާ މީހުންގެ އިތުރުން، ދައުލަތުގެ ބެލުމުގެ ދަށުގައި ޙާލުގައި ޖެހިފައި ތިބި ބިދޭސީންނަށްކަން މިނިސްޓްރީން ފާހަގަކޮށްފައިވެއެވެ.
މިނިސްޓްރީން ވަނީ ކަދުރާ ޙަވާލުވުމަށް ކައުންސިލްތަކަށް 11 މޭ ގެ ނިޔަލަށް ފުރުސަތު ހުޅުވާލާފައެވެ. އެގޮތުން މޭ މަހުގެ 11 ވާ ހޯމަ ދުވަހު 17:00 ގެ ކުރިން މާލޭގައި ހުރި މީހަކު ހަމަ ޖެއްސުމަށްފަހު، މިނިސްޓްރީއަށް ކަދުރާ ޙަވާލުވުމަށް ފޮނުވުމަށް އެދިފައިވެއެވެ.
އިސްލާމިކް މިނިސްޓްރީން ބުނީ، މުޅި ރާއްޖެއަށް ކާބޯތަކެތި ލިބުން ދަތިވެފައިވާ މިފަދަ ދަނޑިވަޅެއްގައި، މި މުއްދަތުގެ ތެރޭގައި ވީހާވެސް ގިނަ ކައުންސިލްތަކުން ކަދުރާ ޙަވާލުވެ، ރައްޔިތުންނަށް ކަދުރު ފޯރުކޮށްދިނުމަކީ މިނިސްޓްރީގެ ވަރަށް ބޮޑު އެދުމެއް ކަމަށެވެ. އަދި މި މުއްދަތުގެ ނިޔަލަށް ނުގެންގޮސް ހުންނަ ކަދުރުތައް މަސައްކަތުގެ ގޮތުން އެކަހެރިވެފައިތިބި މީހުން ތިބި ފެސިލިޓީތަކަށާއި، ކަރަންޓީނުކޮށްފައި އަދިއެކަހެރިކޮށްފައި މީހުން ތިބި ފެސިލިޓީތަކަށާއި، އަދި މީގެ އިތުރުން ދިވެހި ސަރުކާރުގެ ބެލުމުގެ ދަށުގައި ޙާލުގައި ޖެހިފައިވާބިދޭސީން ތިބި ފެސިލިޓީތަކަށް ހަދިޔާ ކުރާނެކަމަށްވެސް މިނިސްޓްރީން ބުނެފައިވެއެވެ.
