ކޮވިޑް-19 ގެ ނުރައްކަލަށް ހުށަހެޅިފައިވާ 113 ބިދޭސީން މިރޭ ގުޅީފަޅުގައި ގާއިމުކޮށްފައިވާ ކަރަންޓީނު ފެސިލިޓީއަށް ބަދަލުކުރެވޭނެ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.

ހޮނޮހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކޮވިޑް-19 އަށް ޕޮޒިޓިވްވެފައިވާ 82 މީހަކު ހުޅުމާލެ ފޭސް ޓޫ އެކްސްޕެޓްރިއަޓް އައިސޮލޭޝަން ފެސިލިޓީއަށް ބަދަލުކުރެވޭނެ ކަމަށެވެ.

ކޮވިޑް-19 ފެތުރުން ކޮންޓްރޯލް ކުރުމަށް އެންމެ އިސްކަމެއްދީގެން މިހާރު ސަރުކާރުން ކުރަމުންދާ ކަމަކީ މާލެ ސަރަހައްދުގައި ތޮއްޖެހިފައި ތިބި ބިދޭސީންގެ މައްސަލަ ހައްލުކުރުމެވެ. އެގޮތުން ހުޅުމާލެ އަދި ގުޅީފަޅުގައި ބިދޭސީންނަށް ޚާއްސަކޮށްގެން ކަރަންޓީނު އަދި އައިސޮލޭޝަން ފެސިލިޓީތައް އަންނަނީ ހަދަމުންނެވެ.

މަބްރޫކް ވިދާޅުވީ ގުޅީފަޅުގައި 674 މީހުންގެ ޖާގައިގެ ކަރަންޓީނު ފެސިލިޓީއެއް ހަދަމުންދާ ކަމަށެވެ. އަދި ހުޅުމާލޭގައި އޮކޮނޮމިކް މިނިސްޓްރީގެ ފަރާތުން 2700 މީހުންގެ ޖާގައިގެ ތަނެއް ހަދަމުންދާ ކަމަށް މަބްރޫކް ވިދާޅުވި އެވެ. އެތަން ނިންމުމަށް މަސައްކަތްކުރަމުންދަނީ ދެ ހަފްތާގެ ތެރޭގައި ކަމަށް މަބްރޫކް ވިދާޅުވި އެވެ.

މީގެއިތުރުން ހޯމް މިނިސްޓްރީގެ ފަރާތުންވެސް ހުޅުމާލޭގައި ކަރަންޓީނު ފެސިލިޓީއެއް ބިދޭސީންނަށް އަމާޒުކޮށްގެން ހަދަމުންދާ ކަމަށް މަބްރޫކް ވިދާޅުވި އެވެ.

މިވަގުތުވެސް މާލެ ސިޓީގެ 23 ތަނެއްގެ ހާހަށްވުރެ ގިނަ މީހުންގެ ކަންކަން ސަރުކާރުގެ ފަރާތުން އަންނަނީ ބަލަހައްޓަމުންނެވެ.