ކޮންޓެކްޓް ޓްރޭސިންގެ ތެރެއިން 3825 މީހަކު ފާހަގަ ކުރެވިއްޖެ
2 މެއި 2020 | ހޮނިހިރު 17:34މިހާރު ފަރުވާ ދެމުން ދަނީ 498 މީހަކަށް، ޕޮޒިޓިވްވެފައިވަނީ 519 މީހަކު
ނެޝަނަލް އެމަރޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒު
ރާއްޖޭގައި ކޮވިޑް-19 އަށް ޕޮޒިޓިވްވި މީހުންނާއި އެކި ގޮތްގޮތުން ކޮންޓެކްޓްވި 3825 މީހަކު ފާހަގަކުރެވިފައިވާ ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއޯއީސީ) އިން ބުނެފިއެވެ.
ހޮނިހިރު ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވީ ރާއްޖޭގައި 519 މީހަކު ޕޮޒިޓިވްވެފައިވާ ކަމަށެވެ. އަދި މީގެ ތެރެއިން 498 މީހަކަށް ފަރުވާ ދެމުން އަންނަ ކަމަށެވެ.
މަބްރޫކް ވިދާޅުވީ މިހާތަނަށް 260 ތަނެއް މޮނީޓަރިންގ ގެ ހާލަތަށް ގެނެސްފައިވާ ކަމަށާއި މޮނީޓަރިންގ ގެ ހާލަތުން އާންމު ހާލަތަށް ދަރުމަ ދޯނި، ބ. ކެންދޫ، ހއ. ދިއްދޫ ހއ. އުތީމު ގެނެވިފައިވާ ކަމަށެވެ.
އޭނާ ވިދާޅުވީ އައިސޮލޭޝަން ފެސިލިޓީތަކުގައި މިވަގުތު 447 މީހަކު އެބަތިބި ކަމަށެވެ. އަދި ކަރަންޓީންގައި 1311 މީހުން ތިބިއިރު މީގެ ތެރެއިން 3 މީހަކު ދޫކުރެވިފައިވާ ކަމަށެވެ.
މިހާތަނަށް 8429 ސާމްޕަލް ނަގާފައިވާއިރު އޭގެ ތެރެއިން 7700 ސާމްޕަލްގެ ނަތީޖާ ނެގެޓިވްވެފައިވާ ކަމަށް ވެސް މަބްރޫކް ވިދާޅުވިއެވެ. އަދި ނަތީޖާ ނުލިބި 215 ސާމްޕަލެއްވާކަމަށް ވެސް އޭނާ ވިދާޅުވިއެވެ.
ކޮންޓެކްޓް ޓްރޭސިންގެ މަސައްކަތުން ފާހަގަވެފައިވާ ބައެއް ކަންތައްތަކަށް އަލިއަޅުއްވާލައްވަމުން ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްޕީއޭގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވިދާޅުވީ ކޮންޓެކްޓް ޓްރޭސިންގ ގެ މަސައްކަތުން އައު ކޭސްތައް ފެނިފައިނުވާ ކަމަށެވެ. އެގޮތުން ގިނަ ފަހަރަށް ކޮންޓެކްޓް ޓްރޭސިންގ ގެ މަސައްކަތުން ފާހަގަވާ ފަރާތްތަކަކީ އެހެން ކްލަސްޓަރ އަކާއި ނުވަތަ އެހެން ކޭސްއަކާ ގުޅުންހުރި ފެނިފައިވާ ކޮންޓެކްޓްސްތައް ކަމަށެވެ.
ރާއްޖެއިން މިހާތަނަށް 519 މީހަކަށް މި ވައިރަސް ޖެހިފައިވާއިރު އޭގެ ތެރޭގައި 177 ދިވެހިންނާއި 343 ބިދޭސީން ހިމެނެއެވެ.
