ކޮވިޑް-19 އާއި ދެކޮޅަށް ކުރީ ސަފުގައި މަސައްކަތް ކުރާ ފަރާތްތަކަށް އެހީ ވުމުގެ ގޮތުން ޕީޕީއީ ކިޓު ހަދިޔާ ކުރުމަށް ބޮލީވުޑްގެ މަޝްހޫރު ތަރި ސޮނާކްޝީ ސިންހާ ގޮވާލައިފިއެވެ.

ހުކުރު ދުވަހު ސޮނާކްޝީ އިންސްޓަރގްރާމްގައި ކުރި ޕޯސްޓެއްގައި ބުނެފައި ވަނީ ހޮސްޕިޓަލުތަކަށް ބޭނުންވާ ވަރަށް ޕީޕީއީ ކިޓް ނެތް ކަމަށެވެ. މިއަދު ހޮސްޕިޓަލްތަކަށް އެންމެންގެ އެހީތެރިކަން ބޭނުންވެފައިވާ ކަން ފާހަނގަކުރަމުން ސޮނާކްޝީ ބުނީ ޑޮކްޓަރުންނާއި، ނަރުހުން އަދި މެޑިކަލް އޮފިސަރުންނަށް ޕީޕީއީ ކިޓުގެ ބޭނުން ޖެހިފައިވާ ކަމަށެވެ.

ކޮވިޑް-19 އާއި ގުޅިގެން އިންޑިއާ ފުރަބަންދުކޮށްފައި ވާއިރު، އެ ޤައުމުގެ ގިނަ ފަންނާނުން އަންނަނީ އެކި ގޮތްގޮތުން އެހީތެރިކަން ފޯރުކޮށްދެމުންނެވެ. އަދި ކޮވިޑް-19 އާއި ދެކޮޅަށް އެޤައުމުން ކުރަމުންދާ މަސައްކަތްތަކައް އެހީތެރިވުމަށް އެކި ޖަމްޢިއްޔާތަކުންނާއި، ވަކި ވަކި ފަރުދުން ދަނީ އޮންލައިން ވެބްސައިޓްތައް ހަދާ ފަންޑު ހޯދައިދެމުންނެވެ.

ސޮނާކްޝީ ވެސް ވަނީ އޮންލައިންކޮށް އެހީތެރިކަން ފޯރުކޮށްދިނުމަށް އެދި ވެބްސައިޓެއްގެ ލިންކުވެސް އެނާ ޕޯސްގައި ހިމަނާފައެވެ. އަދި ވެބް ސައިޓް މެދުވެރިކޮށް ޕީޕީއީ ކިޓް ހަދިޔާ ކުރުމަށް އެހީތެރިވެވޭނެ ކަމަށް އެނާ ބުންޏެއެވެ.