އައިޖީއެމްއެޗްގެ އިމަރޖެންސީ އެއްވެސް އޮޕަރޭޝަނެއް ހުއްޓާލާފައެއް ނުވާނެ: ޑރ. ނަޒީމް
2 މެއި 2020 | ހޮނިހިރު 13:07އިމަރޖެންސީ އޮޕަރޭޝަންތައް ހުއްޓާލި ކަމަށް ދެކެވޭ ވާހަކައަކީ ހަގީގަތާ ހިލާފު ވާހަކަތަކެއް
ހޮނިހިރު ދުވަހުގެ ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗްގެ މަސައްކަތްތައް ވަރަށް ތަފްސީލްކޮށް ކިޔާދެއްވާފައިވޭ
އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި އިމަރޖެންސީ އެއްވެސް އޮޕަރޭޝަނެއް ހުއްޓާލާފައިނުވާ ކަމަށް އެހޮސްޕިޓަލްގެ މެޑިކަލް ޑައިރެކްޓަރ ޑރ. އަލީ ނަޒީމް ވިދާޅުވެއްޖެއެވެ.
ހޮނިހިރު ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި، ޑރ. ނަޒީމް ވިދާޅުވީ އިމަރޖެންސީ އޮޕަރޭޝަންތައް ހުއްޓާލިކަމަށް ފަތުރަމުންދާ ވާހަކައަކީ ޙަޤީޤަތާ ޚިލާފު ވާހަކަތަކެއް ކަމަށެވެ.
ޑރ. ނަޒީމް ވިދާޅުވީ އިމަރޖެންސީ ސަރޖަރީތައް ކުރިއަށްދާނެ ކަމަށާއި، އެއީ ހުއްޓޭނެ އެއްޗެއް ނޫން ކަމަށެވެ. އަދި ވިދާޅުވީ ސެމީ-އިމަރޖެންސީ ސަރޖަރީތައް ވެސް ކުރިއަށްދާ ކަމަށެވެ.
ޑރ. ނަޒީމް ވިދާޅުވީ ބައެއް ކަހަލަ ސަރޖަރީސްތަކަކީ އޭގެ ބާވަތުން ލަސްވާނަމަ، ބަލިމީހާގެ ފުރާނައަށް ގެއްލުން ވެދާނެ ނުވަތަ ބަލި އިތުރަށް ބޮޑުވެދާނެ އޮޕަރޭޝަންތަކެއް ކަމަށެވެ. އެބާވަތުގެ އޮޕަރޭޝަންތައް ލަސް ނުކޮށް ކުރަމުން އަންނަކަމަށް ޑރ. ނަޒީމް ވިދާޅުވިއެވެ.
