4 ފިޔަވަޅެއް އެޅުމަށް ވަނީ ނިންމާފަ
ރީރެޖިސްޓްރޭޝަންގެ ފުރުސަތު ހުޅުވާލުމުން ގަލޮޅުދަނޑުކައިރިއަށް ބިދޭސީން ޖަމާވެފައި
ކޮވިޑް-19ގެ ނުރައްކަލަށް ހުށަހެޅިފައިވާ ބިދޭސީން ކަރަންޓީނު ކުރުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަންގައިފިއެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވާ އެޗްޕީއޭ އިން ނެރުނު ބަޔާނުގައި ބުނީ ކޮވިޑް-19 މާލެ ޞަރަޙައްދުގައި ހަލުވިކަމާއެކު ފެތުރެމުންދާއިރު، މިބަލި އެންމެ ބޮޑަށް ފެތުރެމުންދަނީ މާލެ ގައި ދިރިއުޅޭ ބިދޭސީންގެ މެދުގައިކަމަށެވެ.
ބިދޭސީ މަސައްކަތްތެރިންގެ މެދުގައި ހަލުވިކަމާއެކު ބަލި ފެތުރުމުގެ ފުރުޞަތު ބޮޑުކަމަށް ފެންނާތީ، އެޗްޕީއޭއިން ވަނީ ބަލި ފެތުރުން ކޮންޓްރޯލްކުރުމަށްޓަކައި ފިޔަވަޅުތަކެއް އެޅުމަށް ނިންމާފައެވެ.
އެޗްޕީއޭ އިން ވަނީ މި ފިޔަވަޅުތައް ތަންފީޒުކޮށް، އެ ފިޔަވަޅުތަކަށް ފުރިހަމައަށް ޢަމަލުކުރުމަށް، އެންމެހައި އިދާރާތަކަށް އަންގާފައެވެ. އަދި، ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް ޢަމަލުކުރުމަށްވެސް އަންގާފައިވެއެވެ.
މިހާތަނަށް ރާއްޖޭގައި ގިނަ ޢަދަދެއްގެ ބިދޭސީ މަސައްކަތްތެރިން ވަނީ މިވައިރަސް އަށް ޕޮޒިޓިވްވެފައެވެ. މީގެއިތުރުން މިވަގުތު ފެންނަ ހުރި ބޮޑެތި ކްލަސްޓަރ ތައްވެސް ނިޞްބަތްވަނީ ބިދޭސީންނަށެވެ. އެގޮތުން ކޮވިޑް ވިލެޖް ކްލަސްޓަރ އާއި ބާޒާރުމަތި ކްލަސްޓަރ ފާހަގަކޮށްލެވެއެވެ.
މާލެ ތެރޭގައި ތޮއްޖެހިފައިވާ ތަންތަނުގަ ދިރިއުޅެމުން އަންނަ ބިދޭސީން އެއަށްވުރެ ރަނގަޅު މާޙައުލަކަށް ބަދަލުކޮށް ތޮއްޖެހުން ކުޑަކުރުމަކީ މާލެ ސިޓީގެ "ފުރަބަންދު" އިތުރުކުރި އެއް ސަބަބު ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް ވަނީ ވިދާޅުވެފައެވެ. އެގޮތުން ޓެގް ޓީމުން ލަފާދީފައިވަނީ ބިދޭސީން ތޮތްޖެހުމުގެ މައްސަލަ ޙައްލުކުރުމުގެ މަސައްކަތް ފުރަބަންދުގައި ތިބެގެން ކުރުމަށް ކަމަށް މަބްރޫކް ވިދާޅުވިއެވެ.
