މާލެ ސިޓީ ކައުންސިލް މެމްބަރު މަމްނޫން ރައީސް މައުމޫން ފެކްޝަނާ ގުޅިވަޑައިގަންނަވައިފި
3 އެޕްރީލު 2017 | ހޯމަ 01:40ޕީޕީއެމުން ރައީސް މައުމޫން ވަކިކުރުމަށް ވޯޓް ދެއްވުނީތީ މައާފަށް އެދިވަޑައިގެންނެވި
މާލޭ ސިޓީ ކައުންސިލް މެމްބަރު އިބްރާހީމް މަމްނޫން
މާލެ ސިޓީ ކައުންސިލްގެ މައްޗަންގޮޅި ދެކުނު ދާއިރާގެ މެމްބަރު އިބްރާހީމް މަމްނޫން ޕީޕީއެމް ރައީސް ޔާމީންގެ ފެކްޝަނުން, ޕީޕީއެމް ރައީސް މައުމޫން ފެކްޝަނާ ގުޅިވަޑައިގަންނަވައިފި އެވެ.
މަމްނޫނަކީ ޕީޕީއެމުން ރައީސް މައުމޫން ވަކިކުރުމަށް ރައީސް ޔާމީން ފެކްޝަނުން ނެގި ވޯޓުގައި ރައީސް މައުމޫން ޕީޕީއެމުން ވަކި ކުރުމަށް ވޯޓް ވެސް ދެއްވި ބޭފުޅެކެވެ.
ނަމަވެސް އާދިއްތަ ދުވަހުގެ ރޭ ދަންވަރު 00:45 ހާއިރު ޕީޕީއެމް ރައީސް މައުމޫން ފެންޝަން ހިންގާ ހ. ތެމާ ކުރިމަތީ ކުއްލި ގޮތަކަށް ބޭއްވި ނޫސްވެރިންގެ ބައްދަލު ވުމުގައި މަމްނޫން ވިދާޅުވީ ރައީސް ޔާމީންގެ ފެކްޝަނުގައި އުޅުއްވީ މަޖުބޫރު ވެގެންކަމަށެވެ. ނަމަވެސް އެއީ ކޮން މަޖުބޫރީ ހާލަތެއް ކަމެއް މަމްނޫން ހާމައެއް ނުކުރެއްވި އެވެ. ރައީސް މައުމޫން ޕީޕީއެމުން ވަކިކުރުމަށް ހުށަހެޅި ގަރާރަށް ވޯޓު ދެއްވުނީތީ ޕީޕީއެމްގެ ހުރިހާ މެމްބަރުންގެ ފަރާތުން މައާފަށް ވެސް އޭނާ އެދިވަޑައިގެންނެވި އެވެ.
މަމްނޫން ވިދާޅުވީ ރައީސް ޔާމީންއަށް ޕީޕީއެމް ހިންގުމުގެ އެއްވެސް ބާރެއް ޕާޓީގެ އަސާސީ ގަވާއިދުން ނެތް ކަމަށާއި ރައީސް ޔާމީން ޕީޕީއެމް ހިންގަމުން އެގެންދަވަނީ ޕީޕީއެމް އަސާސީ ގަވާއިދާ ހިލާފަށް ކަމަށެވެ.
މަމްނޫން ވިދާޅުވީ ރައީސް ޔާމީންގެ ޕީޕީއެމް "ދަރުބާރު" ފެކްޝަންގެ ބައްދަލުވުންތަކަށް ދެން ބައިވެރިވެވަޑައި ނުގަންނަވާނެ ކަމަށާއި ދެން ދެމި ހުންނަވާނީ ރައީސް މައުމޫންގެ އިސްލާހީ ހަރަކާތުގައި ރައީސް މައުމޫންގެ ފެކްޝަނުގައި ކަމަށެވެ. މައްޗަންގޮޅި އުތުރު ދާއިރާގެ ޕީޕީއެމް މެމްބަރުންގެ ތާއީދު އޮތީވެސް ރައީސް މައުމޫނަށް ކަމަށް މަމްނޫން ވިދާޅުވި އެވެ.
މާލޭ ސިޓީ ކައުންސިލްގައި ޕީޕީއެމަށް ނިސްބަތްވާ މަމްނޫންގެ އިތުރުން މެދުހެންވޭރު ދާއިރާގެ މެމްބަރު ޒައިދުލް އަމީން އަކީވެސް ރައީސް މައުމޫން ފެކްޝަނަށް ނިސްބަތްވާ މެމްބަރެކެވެ. ޒައިދުލް އަމީން ހުންނެވީ ފުލުހުން ތަހުގީގު ކުރަމުންދާ މައްސަލައަކާ ގުޅިގެން ބަންދުކޮށްފަ އެވެ.
