ވައްކަމާއި ގުޅޭ އެއްވެސް މައުލޫމާތެއް އިނގޭނަމަ ލަސްނުކުރައްވާ ވަގުތުން ރިޕޯޓްކުރައްވާ: ވެލިދޫ ކައުންސިލް
1 މެއި 2020 | ހުކުރު 17:19އެފަދަ ތަކެތި ނުގަތުމަށް ވަނީ އެދިފައި
ނ. ވެލިދޫ
ވަައްކަމާއި ގުޅޭ އެއްވެސް މައުލޫމާތެއް އިނގޭނަމަ ލަސްނުކުރައްވާ ވަގުތުން ރިޕޯޓްކުރެއްވުމަށް ވެލިދޫ ކައުންސިލުން އެދިފިއެވެ.
ރާއްޖެއެމްވީއަށް މައުލޫމާތުދެއްވަމުން ވެލިދޫ ކައުންސިލްގެ ރައީސް އަސްމާ ހުސައިން ވިދާޅުވީ ވެލިދޫގައި ވައްކަން ހުއްޓުމަށްޓަކައި ވެލިދޫ ކައުންސިލާއި ވެލިދޫ ޕޮލިސް ސްޓޭޝަން ގުޅިގެން މަސައްކަތް ކުރަމުންދާ ކަމަށެވެ.
އާބާދީގައި 2600 އަށް ވުރެ ގިނަ މީހުން ދިރިއުޅޭ ވެލިދޫގައި މިދުވަސްވަރު ވައްކަން ކުރުން އިންތިހާއަށް އިތުރުވަމުން ދިއުމާއި ގުޅިގެން ވެލިދޫގެ ރައްޔިތުން ދަނީ ކަންބޮޑުވުން ފާޅު ކުރަމުންނެވެ. ގޭގޭގައި ހައްދާފައި ހުންނަ ތަރުކާރީ އާއި މޭވާގެ ބާވަތްތައް ވަގަށް ނަގާ ވިއްކަމުންދާ ކަމުގެ ޝަކުވާތައްވެސް ރައްޔިތުން ދަނީ ކުރަމުންނެވެ.
މިކަމާއި ގުޅިގެން އަސްމާ ވިދާޅުވީ އެފަދަ ތަކެތި އެނިގިތިބެ ނުގަތުމަށާއި ވައްކަމާއި ގުޅޭ އެއްވެސް މީހެއްގެ މައުލޫމާތު އިނގޭ ނަމަ އަދި އެފަދަ މަނަޒަރެއް ފެނިއްޖެ ނަމަ ލަސްނުކޮށް ރިޕޯޓް ކުރެއްވުމަށެވެ.
ރާއްޖޭގައި ކޮވިޑް-19 ފެތުރެމުންދިއުމާއި ގުޅިގެން ފިޔަވަޅުތައް އަޅަމުންދާ މި ދަނޑިވަޅުގައި އެފަދަ އަމަލުތައް ހިންގަމުން ދިއުމަކީ ކަންބޮޑުވާ ކަމެއް ކަމަށް އަސްމާ ވިދާޅުވިއެވެ. އަދި އެފަދަ އަމަލުތައް ނުކުރުމަށް ކައުންސިލުން ވަނީ އިލްތިމާސް ކޮށްފައެވެ.
ދާދި ފަހުންވެސް ހަނޑޫ ބަސްތާތަކެއް ވަގަށް ނަގައިގެން ނުއަގުގައި ވިއްކަމުންދިޔަ މައްސަލައިގައި ވެލިދޫއިން ވަނީ ދެމީހަކު ހައްޔަރު ކޮށްފައެވެ.
