މެންޗެސްޓާ ސިޓީއަށް ކުޅެމުން އަންނަ ޖަރުމަންގެ ފޯވާޑް ލެރޯއި ސާނޭ ގަތުމަށް، ބަޔާން މިއުނިކުން ކުރިއަށް އޮތް ހޫނު މޫސުމުގެ ޓްރާންސްފާ ބާޒާރުގައިވެސް މަސައްކަތް ކުރާނެ ކަމަށް ރިޕޯޓުތައް ބުނެފި އެވެ.

އުމުރުން 24 އަހަރުގެ ސާނެ ހޯދުމަށް ބަޔާންމިއުނިކުން މީގެ ކުރިންވެސް ވަނީ މަސައްކަތް ކޮށްފައެވެ. އެގޮތުން މި ސީޒަން ފެށުމުގެ ކުރިން، ސާނޭ ގަތުމަށް ބަޔާނުން 100 މިލިއަން ޔޫރޯ ހުށަހެޅި ކަމަށްވެސް ބައެއް މީޑިއާތަކުން ވަނީ ރިޕޯޓުކޮށްފައެވެ.

އެކަމަކު އަދި މިހާތަނަށް އެކަން ކާމިޔާބުވެފައި ނުވާއިރު، ކުރިއަށް އޮތް ހޫނު މޫސުމުގެ ޓްރާންސްފާ ގައިވެސް ސާނޭ ގަތުމަށް ބަޔާނުން މަސައްކަތް ކުރާނެ ކަމަށް ރިޕޯޓުތައް ބުނެއެވެ. ކޮރޯނާވައިރަސް (ކޮވިޑް-19) އާ ގުޅިގެން ހުރިހާ ކްލަބުތަކަށްވެސް މާލީ ގޮތުން ގޮންޖެހުންތަކާ ކުރިމަތިލާން ޖެހިފައިވާއިރު، ހޫނު މޫސުމުގެ ޓްރާންސްފާގައި، ސާނޭ ގަތުމަށް ބަޔާނުން ޚަރަދު ކުރާނީ 60-70 މިލިއަން ޔޫރޯ ކަމަށް ރިޕޯޓުތައް ބުނެއެވެ.

ސިޓީ އާއެކު ސާނޭ ހަދާފައިވާ އެއްބަސްވުން ހަމަވާނީ 2021 ވަނަ އަހަރެވެ. އެކަމަކު ސާނޭ ބަޔާން އަށް ބަދަލުވާން ބޭނުންވާ ކަމަށް ރިޕޯޓުތައް ބުނެއެވެ. ސިޓީގެ ފުރަތަމަ އެގާރައިގައި ހިމެނިގެން ގިނަ މެޗުތަކެއް ކުޅެން ނުލިބޭތީ ސާނޭ އެޓީމު ދޫކޮށްލަން ބޭނުން ވެފައިވާއިރު، އޭނާގެ ނިންމުން އޮޅުން ފިލުވަން ސިޓީން މީގެ ކުރިން ވަނީ އެދިފައެވެ.

ޝާލްކާ އިން 2013 ވަނަ އަހަރުގެ ސީޒަނުގައި ކެރިއަރުފެށި ސާނޭ ވަނީ، އެ ކްލަބަށް ކުޅުނު 57 މެޗުގައި 13 ލަނޑު ކާމިޔާބު ކޮށްފައެވެ. އޭނާ އެ ކްލަބު ދޫކޮށް ސިޓީއަށް ބަދަލުވީ 2016 ވަނަ އަހަރުގެ ސީޒަނުގައެވެ.

އެގޮތުން ސާނޭ ވަނީ ސިޓީއަށް މިހާތަނަށް ކުޅުނު 134 މެޗުގައި 39 ލަނޑު ކާމިޔާބު ކޮށްފައެވެ. އަދި އޭނާ ވަނީ އެ ކްލަބާއެކު އިނގިރޭސި ޕްރިމިއާ ލީގު ދެ ފަހަރެއްގެމަތިން ކާމިޔާބުކޮށްފައެވެ. މީގެ އިތުރުން އިނގިރޭސި ލީގު ކަޕް ދެ ފަހަރެއްގެ މަތިން ކާމިޔާބުކޮށް، އަދި އެފްއޭ ކޮމިއުނިޓީ ޝީލްޑު ދެ ފަހަރު ކާމިޔާބުކޮށް، އެފްއޭ ކަޕްވެސް، އެއް ފަހަރު ކާމިޔާބުކޮށްދީފައެވެ.