މުދާ ކްލިއަރ ކުރުމަށް މަޖޫރީން ކޮންމެހެން ވަންނަންޖެހޭ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) މެނޭޖިންގް ޑިރެކްޓަރ ޝާހިދު އަލީ ވިދާޅުވެއްޖެއެވެ.
އެމްޕީއެލްގެ މަސައްކަތްތަކާ ބެހޭ ގޮތުން މަޢުލޫމާތު ދިނުމަށް ހުކުރު ދުވަހުގެ މެންދުރުފަހު ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޝާހިދު ވިދާޅުވީ މުދާ ކްލިއަރ ކުރުމުގެ މަސައްކަތް ކުރުމަށް މަޖޫރީން ކޮންމެހެން ވަންނަންޖެހޭ ކަމަށާއި، ނުވަންނަ އުޞޫލަކުން މަސައްކަތް ކުރާނަމަ މިގެންދާ ރޭޓްގައި ވެސް ކްލިއަރެންސްގެ މަސައްކަތް ކުރުމަށް ވަރަށް އުދަނގޫވާނެ ކަމަށެވެ.
އެގޮތުން މަޖޫރީންނާއި، އެމްޕީއެލްގެ މުއައްޒަފުން ވީހާ ވެސް ބޮޑަށް ދުރުން މަސައްކަތް ކުރެވޭނެ އުޞޫލެއްގެ ދަށުން މަސައްކަތްތައް ކުރިއަށް ގެންދާ ކަމަށް ޝާހިދު ވިދާޅުވިއެވެ.
މަޖޫރީން އަޅުގަނޑުމެންގެ މުއައްޒަފުންނާ ވީހާ ވެސް ދުރުން މަސައްކަތް ކުރެވޭ ގޮތަކަށް. އެއީ ކޮންޓެއިނަރ ކަނޑާފަ ދެން މަޖޫރީން ނެރެންވާ އެއްޗެއް ނެރިފަ ދެން މިސާލަކަށް ލޮރީގަ ޖައްސާ ކަމަށްވަންޏާ އަޅުގަނޑުމެންގެ މުއައްޒަފުން އެހިސާބުން ދުރަށް ދިއުން. މިއީ މުދާ ބާލާގެން ގެސްފަ ގުދަނުގަ ޖައްސާފަ ދެން ލޮރީއަށް ބަރުކުރަން ފަށާ ހިސާބުން ދެން އަޅުގަނޑުމެންގެ މުއައްޒަފުންނާއި މަޖޫރީންނާ ވިހާ ވެސް ދުރުން މަސައްކަތް ކުރުން.މެނޭޖިންގް ޑިރެކްޓަރ ޝާހިދު އަލީ
ޝާހިދު ވިދާޅުވީ ކޮންމެ މަޖޫރީއަކު ވެސް ހެނދުނު އެތެރެއަށް ވަންނަންޖެހޭ ގަޑިއެއްގައި ވަންނާނެ ކަމަށާއި، އެމީހުން ވަންނައިރުގައި ޓެންޕަރޭޗަރ ސްކްރީނިން ކޮންމެ ދުވަހަކު ހަދާނެ ކަމަށެވެ.
އެގޭ އިތުރުން އެމްޕީއެލް މެދުވެރިކޮށް މަޖުރީންނަށް ފާސް ހޯދުމުގެ މަސައްކަތް މިކުރަނީ. ފާސް ހޯދާއިރު ވެސް އެންއޯއީސީ މެދުވެރިވެގެން ހުރިހާ އެންމެންގެ ކޮންޓެކްޓް ޓްރޭސިން ހެދިގެން އޭގެ އެއްވެސް ކޮންޓެކްޓް މިހާތަނަށް އައިޑެންޓިފައި ވެއްޖެއްޓާ ލިސްޓުން އަލިމިނޭޓް ކޮށްގެން މަސައްކަތް މިކުރިއަށް ގެންދަނީ.މެނޭޖިންގް ޑިރެކްޓަރ ޝާހިދު އަލީ
ޝާހިދު ވިދާޅުވީ އެމްޕީއެލްގެ މަސައްކަތްތައް ކުރިއަށް ގެންދަނީ ވަރަށް ބޮޑަށް ޕްލޭން ކުރެވިގެން ކަމަށެވެ.
އެގޮތުން ރައްކާތެރިވުމަށްޓަކައި އަޅަންޖެހޭ ފުރިހަމަ ފިޔަވަޅުތައް އަޅަމުންދާކަން ޝާހިދު ފާހަގަކުރެއްވިއެވެ.
