ބައެއް ކަސްޓަމަރުންނަށް އޭޕްރިލް މަހުގެ ބިލް ފޮނުވާފައިވާނީ ޑިސްކައުންޓް ނުހިމަނާ ކަމަށާއި އެ ބިލްތައް އިސްލާހު ކުރުމަށްފަހު އަލުން ފޮނުވާނެ ކަމަށް މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) ގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.

ކޮވިޑް-19 އާ ގުޅިގެން ރާއްޖެޓީވީން ކުރިއަށް ގެންދާ ހާއްސަ ކަވަރޭޖް އަށް ދެއްވި އިންޓަވިއުއެއްގައި ޝާހު ވިދާޅުވީ މީޓަރުގެ ފޮޓޯ ފޮނުވަން އެންގުމުން ވަރަށް ގިނަ ފަރާތްތަކުން ފޮޓޯ ފޮނުވާފައިވާ ކަމަށާއި އޭގެ ތެރެއިން ބައެއް ފޮޓޯތައް ތަރުބީކުރުމަށްފަހު 1355 ކަސްޓަމަރަކަށް ބިލް ފޮނުވާފައިވާ ކަމަށެވެ. ނަމަވެސް އޭރު ފިނޭންސް މިނިސްޓްރީން އިރުޝާދު ނުލިބުމުން، އެ ބިލްތަކުގައި ޑިސްކައުންޓް ފެންނަން ނުހުންނާނެ ކަމަށް އޭނާ ވިދާޅުވިއެވެ.

މި ކަސްޓަމަރުންގެ އިތުރުން ބިލްތައް އަދި ނުފޮނުވާ ކަސްޓަމަރުންނަށް ވެސް ދެން ބިލް ލިބިގެންދާނީ 30 އިންސައްތަ ޑިސްކައުންޓާއެކު ކަމަށް ޝާހު ވިދާޅުވިއެވެ.

ޝާހު ވިދާޅުވީ ބައެއް ފަރާތްތަކުން ފެން ބިލް ބޮޑުވާކަމުގެ ޝަކުވާ ކުރާ ކަމަށާއި އެ ޝަކުވާ ހުށަހެޅުމުން މީޓަރ ރީޑިންގ ނެގިފައި ހުރީ ރަނގަޅަށް ތޯ އެމްޑަބްލިޔުއެސްސީން ބަލައިދޭނެ ކަމަށެވެ. އަދި އެކަމުގެ ޝަކުވާ 105 އަކަށް ގުޅައިގެން ހުށަހެޅޭނެ ކަމަށް އޭނާ ވިދާޅުވިއެވެ.

މީގެ އިތުރުން ބިލް ކުރެވިފައިވާ މުއްދަތު ބެލުމަށް ޝާހު ވަނީ އިލްތިމާސް ކުރައްވާފައެވެ. އެއީ ބައެއް ފަހަރު 39 ދުވަހަށް ނޫނީ 34 ދުވަހަށް ބިލްކޮށްފައި ހުންނާނެ ކަމަށާއި އެކަމުގެ ސަބަބުން ބިލް އިތުރުވެފައި ހުރުމަކީ ވެސް އެކަށީގެންވާ ކަމެއްކަން ޝާހު ފާހަގަކުރެއްވިއެވެ.

އަދިވެސް މީޓަރުގެ ފޮޓޯ ނުފޮނުވާ ކަސްޓަމަރުންނަށް އެ ފޮޓޯތައް ނެގުމަށްފަހު 7984463 ނަންބަރަށް ވައިބަރ ކުރުމުން އެމްޑަބްލިޔުއެސްސީން އެދިފައިވެއެވެ. މީޓަރުގެ ފޮޓޯ ނުފޮނުވާނަމަ ކަސްޓަމަރުންނަށް ލިބިގެންދާނީ އެވަރެޖް ބިލެކެވެ.

ބައެއް ފަރާތްތަކުގެ މާލީ ހާލަތު ހުރި ގޮތުން ބިލް އެއްފަހަރާ ނުދެއްކޭ ކަމުގައިވާނަމަ އެކަމުގައި ވެސް ކަސްޓަމަރުންނަށް ލުއި ފަސޭހަ ގޮތްތަކެއް ހަމަޖެހިގެންދާނެ ކަމަށް ޝާހު ވިދާޅުވިއެވެ.

މި ދަނޑިވަޅުގައި އެއްވެސް ފަރާތަކުން ބިލް ނުދެއްކިޔަސް، އެ ގެއަކުން ފެން ކަނޑާ، މީޓަރުގައި ތަޅު ނާޅުވާނެ ކަމަށް ޝާހު ވިދާޅުވިއެވެ.