ރިޝީ، ނީތޫއަށް: ޑޭޓްކުރެވިދާނެ، ނަމަވެސް ކައިވެންޏެއް ނުކުރެވޭނެ

ބޮލީވުޑް އެކްޓަރ ރިޝީ ކަަޕޫރުގެ މަރުގެ ޚަބަރު ވެގެންދިޔައީ މުޅި ބޮލީވުޑަށް ލިބިގެންދިޔަ ފުން ހިތާމައަކަށެވެ.

2018 ވަނަ އަހަރުން ފެށިގެން ނިއުޔޯކްގައި ކެންސަރަށް ފަރުވާ ހޯދުމަށްފަހު ރިޝީ އެނބުރި އިންޑިއާއަށް ގޮސްފައިވަނީ މިދިޔަ އަހަރުއެވެ. ރިޝީ ނިއުޔޯކްގައި ފަރުވާ ހޯދަމުން ދިޔަ އިރު އޭނާގެ އެންމެ ގާތުގައި ހުރީ ލޯބިވާ އަނބިމީހާ އަދި ކުރީގެ އެކްޓަރ ނީތޫ ސިންގް އެވެ. އުފަލާއި ހިތާމައިގެ ހާލަތުގައިވެސް މި ޖޯޑު ވަނީ އެހެންތަރިންނަށް ލޯބީގައި މިސާލު ދައްކުވަދީފައެވެ.

22 ޖެނުއަރީ 1980 ގައި މި ދެތަރިން ކައިވެނި ކޮށް އެކުގައި 40 އަހަރު ހޭދަކޮށްފައިވީނަމަވެސް ދެތަރިންގެ ދެމެދުގައި ލޯބީގެ ގުޅުން އުފެދިގެން ދިޔައީ ކައިވެންޏަކާއި ހަމައަށް ދާނެ ކަމުގެ އެއްވެސް އުއްމީދަކާއި އެކުއެއް ނޫނެވެ.

ބޮލީވުޑްގެ " ޗޮކްލެޓް ބޯއީ" ގެ ނަމުން މަޝްހޫރު ވެފައިވާ ރިޝީ އާއި ނީތޫ ދިމާވެފައިވަނީ 1974 ވަނަ އަހަރު ދެތަރިން އެކުގައި ފުރަތަމަ ކުޅުނު ފިލްމް "ޒެހެރީލާ އިންސާން" ގެ ސެޓުންނެވެ.

ފިލްމް އިންޑަސްޓްރީގައި އެކުގައި މަސައްކަތް ކުރަން ފެށުމުން ދެތަރިންގެ ދެމެދުގައި ވަނީ ރަހުމަތްތެރިކަން އުފެދިފައެވެ.

ރިޝީއަށް އޭނާގެ ގާތް އެކުވެރިޔާ ނީތޫ އާއި ދުރުގައި ހުންނަން ޖެހުމުގެ އިހުސާސް ކުރެވެން ފަށާފައިވަނީ ފިލްމް ޝޫޓިންއަކަށް މުމްބާއީން ބޭރަށް ދިއުމުން ނެވެ.

ހަނދާންވާކަމަށް ބުނެ ނީތޫއަށް ރިޝީ ވަނީ މެސެޖެއްވެސް ފޮނުވާފައެވެ. މެސެޖްގައި "ޔޭ ސިކްނީ ބަޅީ ޔާދް އާތީހޭ" ލިޔެފައި ވެއެވެ.

ރިޕޯޓްތައް ބުނާގޮތުން މުމްބާއީ އަށް ރިޝީ އެނބުރި އައުމަށްފަހު މި ދެތަރިން ވަނީ ޑޭޓްކުރަން ފަށާފައެވެ. އެއިރު ނީތޫގެ އުމުރަކީ އެންމެ 14 އަހަރެވެ. ރިޝީވަނީ ޑޭޓް ކުރިނަމަވެސް ކައިވެނި ނުކުރާނެ ކަން ސާފުކޮށް ނީތޫ އަށް ބުނެދީފައެވެ.

ކޮންމެއަކަސް ފަސް އަހަރު ދުވަހު ޑޭޓް ކުރުމަށްފަހު މި ދެތަރިން ވަނީ ކައިވެނި ކޮށްފައެވެ. ރިޕޯޓްތައް ބުނާ ގޮތުން ކައިވެނި ކުރިއިރު ރިޝީގެ އުމުރަކީ 26 އަހަރެވެ. ނީތޫގެ އުމުރަކީ 21 އެވެ.

މި ދެމީހުނަށް ވަނީ އަންހެން ދަރިއަކާއި ފިރިހެން ދަރިއަކު ލިބިފައެވެ. އެއީ ރަންބީރު ކަޕޫރާއި ރިއްދިމާ ކަޕޫރެވެ.

ރިޝީ އާއި ނީތޫ އެކުގައި ކުޅުނު ފިލްމްތަކުގެ ތެރޭގައި "ދޯ ދޯނީ ޗާރު"، " ލަވް އާޖްކަލް"، "ބޭޝަރަމް"، "ކަބީ ކަބީ"ގެ ިއތުރުން ވެސް ގިނަ ފިލްމްތައް ހިމެނެއެވެ.