ފްރާންސްގެ ޑިޒްނީލޭންޑް ޕެރިސްގައި ފުރަތަމަ ފަހަރަށް ބޮލީވުޑް ތީމްގެ ކައިވެންޏެއް ކޮށްފިއެވެ.

އުމުރުން 29 އަހަރުގެ ވަރުން ބަނޮތް އާއި އަނީޝާ ސެތް ކައިވެނި ކޮށްފައިވަނީ، ޑިސްނީ ލޭންޑްގެ ސްލީޕިން ބިއުޓީ ކާސަލްގައެވެ. އޭގެ ފަހުން އެ ދެމަފިރިން ވަނީ ހިންދޫ ސަގާފީ ކައިވެންޏެއް ޕާކް ލޭކްގައި ކޮށްފައެވެ. ކައިވެންޏަށް ފަހު އެ ދެމީހުން ވަނީ ހިންދީ ލަވަޔަށް ޑާންސްކޮށްފައެވެ.

350 މީހުން ހާޒިރުވި އެ ހަފްލާގައި، ކައިވެނީގެ ހޯލް ތައްޔާރު ކޮށްފައިވަނީ އަލާއްދީން ކާޓޫންގެ ތީމަށެވެ. މެހެމާނުންނަށް ބުފޭގައި ކާން ހަދާފައި ހުރީ މެދުއިރުމަތީގެ އިތުރުން އިންޑިއާގެ ކާއެއްޗެހިއެވެ.

ލަންޑަނުގައި ޗެރިޓީ އެއް ހިންގަމުންދާ އެ ދެމަފިރިން ކައިވެންޏަށް ތައްޔާރުވަމުން އަންނަތާ އެއް އަހަރު ދުވަސްވެއްޖެއެވެ. ފަސް އަހަރަށް ވުރެ ގިނަ ދުވަސްވަންދެން ރައްޓެހިވެގެން އުޅުނު ބަނޮތް އާއި އައިޝާ ވަނީ އެ ކައިވެންޏަށް ބޮޑު އަދަދަކުން ހޭދަ ކޮށްފައެވެ.

ޑިސްނީލޭންޑް ގައި އާއްމުކޮށް ކައިވެނި ކުރާ ޕެކޭޖް ވިއްކާ އުޅެނީ، 32 ހާހާއި 48 ހާސް ޔޫރޯ ދެމެދުގައެވެ.