ބޮޑު ހަރަދެއްކޮށްގެން މަރާމާތުކުރި ފަރުކޮޅުފުއްށީގެ މައްސަލަތަކެއް ފެނުމަކީ ދެރަކަމެއް: މަބްރޫކް
30 އެޕްރީލު 2020 | ބުރާސްފަތި 12:24ފުރާޅުން ފެން ލީކުވި މައްސަލަ ދިމާވެފައިވޭ
ފަރުކޮޅުފުށި މަރާމަތުކުރީ ދެފިޔަވައްސަކަށް ބަހާލައިގެން
ހައި ރިސްކު ބަލި މީހުންނަށް ޚާއްސަކުރި ފަރުކޮޅުފުށި އައިސޮލޭޝަން ފެސިލިޓީ ބޮޑު ހަރަދުކޮށްގެން މަރާމާތު ކުރި ނަމަވެސް މަރާމާތު ކުރަންޖެހޭ ކަންތައްތަކެއް ހުރުމަކީ ދެރަ ކަމެއް ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ފަރުކޮޅުފުއްޓަކީ ވަރަށް ގިނަ ހަރަދުތަކެއް ކުރެފައިވާތަނެއް ކަމަށާއި، އެކަން ކޮށް ނިމުނުއިރުގައި އަދި އިތުރަށް މަރާމާތު ކުރަންޖެހޭ ކަންތައްތަކެއް ފާހަގަކުރެވިފައި ވުމަކީ ކަންބޮޑުވާ ކަމެއް ކަމަށެވެ.
މަބްރޫކް ވިދާޅުވީ ފުރާޅުން ފެން ލީކްވުމާއި، ކަރަންޓުގެ މައްސަލަ އަދި މަދިރި ހެފުން ފަދަ މައްސަލަތައް ފާހަގަކުރެވިފައިވާ ކަމަށެވެ.
މާލެއިން ދެން ޕޮޒިޓިވްވާ މީހުން ގެންދާނީ މަލަހިނި ކުޑަބަނޑޮހަށްކަން ފާހަގަކުރައްވައި މަބްރޫކް ވިދާޅުވީ މިއީ ޕްލޭން ބީ ގެދަށުން ކުރެވޭ މަސައްކަތްތައް ކަމަށާއި، ފަރުކޮޅުގައި ތިބި ބަލިމީހުން މިހާރު އެރަށަށް ގެންދިއުމުގެ މަސައްކަތް ކުރަމުންދާ ކަމަށެވެ.
މަބްރޫކް ވިދާޅުވީ ފަރުކޮޅުފުއްޓަށް ދިމާވި މައްސަލަތައް ހައްލު ކުރުމުގެ މަސައްކަތްތައް ކުރާނެ ކަމަށާއި، މަރާމާތަށްފަހު އަނެއްކާ ވެސް އެތަން ބޭނުން ކުރެވިގެންދާނެ ކަމަށެވެ.
ދެފަހަރެއްގެ މަތިން ފަރުކޮޅުފުށި ވަނީ މަރާމަތުކޮށްފައެވެ. އަދި ދެ ވަނަ ފަހަރު އެތަން މަރާމާތު ކުރިއިރު ކަރަންޓީންގެ ފެސިލިޓީއާ ބޭނުންކުރާ އެކިއުޕްމެންޓާއެކު ޖުމުލަ 5.9 މިލިއަން ރުފިޔާ ޚަރަދުވެފައިވެއެވެ.
ފަރުކޮޅުފުށި އަލުން ހުޅުވާފައިވަނީ 50 އެނދާއި، 2 އައިސީޔޫ އެނދުގެ އިތުރުން، 1 ވެންޓިލޭޓަރުގެ ޚިދުމަތާއެކުއެވެ. މިހާރު ފެސިލިޓީގެ ވާރޑުތައް އޭސީކޮށް، ހުރިހާ ވާރޑެއްގައި ބިއްލޫރި ވަނީ ޖަހާފައެވެ. އަދި ޓީވީ ހަރުކޮށް، ކޮންމެ ވާރޑެއްގައިވެސް ވައިފައިއާއެކު ޓީވީއެއް ބެހެއްޓިފައިވެ އެވެ.
އޭގެ އިތުރުން، ނަރުހުންނަށް ޚާއްޞަކޮށް ނާރސިންގ ސްޓޭޝަނެއްވެސް ވަނީ ޤާއިމުކޮށްފައެވެ. ކޮންމެ ވާރޑެއްގައިވެސް 2 ފާޚާނާ ހުރެއެވެ.
