ލޮކްޑައުން އިއުލާން ކުރިފަހުން އާންމު ކުށްތައް ކުރާ މިންވަރު ދަށް
30 އެޕްރީލު 2020 | ބުރާސްފަތި 07:42ފިހާރަތަކުގައި ބޭރުގައި ބަހައްޓާފައި ހުންނަ ކަހަލަ އެއްޗެހި ވަގަށް ނަގާ މައްސަލަ ހުށަހެޅޭ
މާލެސިޓީގެ މަގުތަކުގައި ފުލުހުން އަބަދުވެސް ހަރަކާތްތެރި ވަމުންދާނެ
ކޮވިޑް-19އާ ގުޅިގެން މާލެ ސިޓީ ލޮކްޑައުން ހާލަތު އިއުލާން ކުރި ފަހުން ކުށް ކުރާ މިންވަރު މާލެ ތެރޭގައި މަދުވެފައިވާ ކަމަށް ފުލުހުން ބުނެފި އެވެ.
ބުދަ ދުވަހުގެ ރޭ ބެއްވި ނޫސްވެރިންގެ ބައްދަލުވުމެއްގައި އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ރިޔާޒު ވިދާޅުވީ މިވަގުތު ހުށަހެޅޭ މައްސަލަތަކަށް ބަލާއިރު އާދައިގެ ވައްކަން ގޮތުގައި ހުށަހެޅެނީ ފިހާރަތަކުގައި ބޭރުގައި ބަހައްޓާފައި ހުންނަ ބައެއް ކަހަލަ އެއްޗެހި ވަގަށް ނެގުމާއި ފަސޭހައިން ވަގަށް ނެގޭ ގޮތަށް ހުންނަ އެއްޗެހި ނަގާ މައްސަލަތައް ކަމަށެވެ.
މައްސަލަތައް މަދުވާ ސަބަބު އިތުރަށް ތަފްސީލް ކޮށްދެއްވާ ރިޔާޒު ވިދާޅުވީ ކުށްކުރުން މަދުވި މައިގަނޑު ސަބަބަކީ މިގޮތަށް ކުށްކުރާ މީހުން އެކިއެކި ގޮތްގޮތުން މިވަގުތު ފުލުހުންގެ ބެލުމުގެ ދަށުގައާ ފުލުހުންގެ ހައްޔަރުގައި ތިބުން ކަމަށް ލަފާ ކުރެވޭ ކަމަށެވެ.
ލޮކްޑައުން މިހާލަތުގައި ފުލުހުން ހިންގަމުންދާ ޚާއްސަ އޮޕަރޭޝަންއާ ބެހޭ ގޮތުން ރިޔާޒު ވިދާޅުވީ ބުދަ ދުވަހުގެ ނިޔަލަށް ލޮކްޑައުންގެ މިއަމުރާ ހިލާފު ވުމުގެ ސަބަބުން 95 މީހަކު ހައްޔަރުކޮށްފައިވާ ކަމަށެވެ. އަދި އޭގެ ތެރެއިން 72 މީހަކު މިވަގުތު ބަންދުގައި ތިބިކަން ރިޔާޒު ފާހަގަކުރެއްވިއެވެ.
ވޭތުވެ ދިޔަ އަހަރުގެ ތަފާސްހިސާބުތަކަށް ބަލާއިރު ރޯދަ މަހު ކުށްކުރާ މިންވަރު އިތުރުވެ އެވެ. ހާއްސަކޮށް ވައްކަމާއި، ފޭރުން އަދި މާރާމާރީ ފަދަ ބައެއް ކުށްތައް މި ދުވަސްވަރުގައި އިތުރުވާކަން ވަނީ ފާހަގަކުރެވިފަ އެވެ.
