ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު ޢަބްދުﷲ ރިޔާޒުގެ އީމެއިލްއަށް ޖަވާބުދީފައިވަނީ ނެޝެނަލް އެމަރޖެންސީ އޮޕްރޭޝަން ސެންޓަރުގައި ހުންނަ ފުލުހުންގެ ކްލަސްޓަރ އިން ކަމަށް އެސިސްޓެންޓް ކޮމިޝަނަރު އޮފް ޕޮލިސް އަބްދުﷲ ފައިރޫޝް ވިދާޅުވެއްޖެއެވެ.

ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ފައިރޫޝް ވިދާޅުވީ މާލެސިޓީ ލޮކްޑައުން ކުރުމަށްފަހުގައު މާލެ އަންނަން ބޭނުންވި މީހުން ގިނަވެގެން ދިޔަކަމަށެވެ. އަދި އެފަރާތްތަކުގެ ކަންބޮޑުވުމުން ހުރުމުން މާލޭގައި ދިރިއުޅޭ ރައްޔިތުންގެ ތެރެއިން އަންނަން ބޭނުންވާ މީހުންނަށް ދެވެން އޮތް މިންވަރަކުން އެ ފުރުސަތު ފަހިކޮށްދިނުމަށް މަޝްވަރާތައް ކުރުމަށްފަހު ފުލުހުން ނިންމި ކަމަށް ފައިރޫޝް ވިދާޅުވި އެވެ.

އެގޮތުގެ މަތިން، 185 މީހަކަށް މިހާ ހިސާބަށް ހުއްދަ ދެވިފައިވާ ކަމަށް ފައިރޫޝް ވިދާޅުވިއެވެ.

ރިޔާޒު މާލެ އައުމުގެ ހުއްދަށް އެދި އީމެއިލް މެދުވެރިކޮށް އެޗްޕީއޭ އަށް އަންގާފައިވަނީ މި މަހުގެ 17 ވަނަ ދުވަހު ކަމަށާއި އެޗްޕީއޭ އިން އެންއީއޯސީގައި ހުންނަ ފުލުހުންގެ ކްލަސްޓަރއަށް އީމެއިލް ފޯރުކޮށްދީފައިވަނީ އޭޕްރިލް 18 ވަނަ ދުވަހު ކަމަށް އޭނާ ފާހަގަކުރެއްވިއެވެ. އަދި އެންއީއޯސީގައި ހުންނަ ފުލުހުންގެ ކްލަސްޓަރއަށް މެއިލްއަށް ޖަވާބު ދީފައިވަނީ 25 އޭޕްރިލްގައި ކަމަށް ވެސް ފައިރޫޝް ވިދާޅުވިއެވެ.

ރިޔާޒު މާލެއައުމަށް ހުއްދަ ދެވުމާއި ގުޅިގެން ވަރަށް ގިނަ އާންމު ރައްޔިތުން ވަނީ އެކަމުގެ ނުރުހުން ފާޅުކޮށްފައެވެ. އަދި ރިޔާޒުއަށް މާލެ އައުމުގެ ހުއްދަ ދެވިގެން ދިޔައީ ކޮން އުސޫލެއްގެ ތެރެއިން ކިހާވަރަކަށް ހާލަތު ބެލުމަށްފަހުގައި ކަމަށް ބުނެ ގިނަ ބަޔަކު ވަނީ ސުވާލު އުފައްދާފައެވެ.

މާލެސިޓީ ލޮކްޑައުން ކުރުމާއި ގުޅިގެން ރަށަށް ދާން ބޭނުންވާ ގިނަ ފަރާތްތަކެއް ވަނީ ތާށިވެފައެވެ. އަދި އެންމެ ނާޒުކު ހާލަތުގައި ވާ މީހުންނަށް ވެސް ހުއްދަ ނުލިބުމަކީ އެމީހުން ނުހަނު ކަންބޮޑުވާ ކަމެކެވެ.