އަންނަ ސީޒަނުގައި ނިއުކާސަލް ޔުނައިޓެޑްގެ ކޯޗަކަށް އާޖެންޓީނާގެ މައުރީސިއޯ ޕޮޗެޓީނޯ ގެންނަން، ސައުދީ އަރަބިއްޔާގެ އިންވެސްޓަރުންގެ ބޮޑު ހިއްސާއަކާ އެކު ނިއުކާސަލް ގަންނަން މަސައްކަތް ކުރަމުން އަންނަ ވެރިން ބޭނުންވާ ކަމަށް ރިޕޯޓުތައް ބުނެފިއެވެ.

މިދިޔަ އަހަރުގެ ނޮވެންބަރު މަހު ޓޮޓެންހަމް ހޮޓްސްޕަރގެ ކޯޗުކަމުން ވަކިކުރި ޕޮޗެޓީނޯ އަދި ޓީމަކާ ހަވާލުވެފައެއް ނުވެއެވެ.

އުމުރުން 47 އަހަރުގެ ޕޮޗެޓީނޯ، ޓޮޓެންހަމްގެ ކޯޗުކަމުން ވަކިކޮށްފައިވަނީ ފަސް އަހަރަށް ފަހުއެވެ. އޭނާ ވަނީ އެ ޓީމުގައި ކާމިޔާބު މަސައްކަތްތަކެއް ކޮށްފައެވެ. އެގޮތުން އެ ޓީމަށް އަލަށް ޗެމްޕިއަންސް ލީގުގެ ފައިނަލުން ފުރުސަތު ހޯދައިދީ ރަނގަޅު ޓީމެއް އެކުލަވާލިއެވެ.

ޕޮޒެޓީނޯ ހޯދަން ރެއާލް މެޑްރިޑް، ބާސެލޯނާ، ބަޔާން މިއުނިކް އަދި މެންޗެސްޓަރ ޔުނައިޓެޑުން ވެސް ވަނީ މަސައްކަތް ކޮށްފައެވެ.

ރިޕޯޓުތައް ބުނާ ގޮތުން ނިއުކާސަލް ގަންނަން އުޅޭ ވެރިން އެންމެ ބޮޑަށް ބޭނުންވަނީ އަންނަ ސީޒަނުން ފެށިގެން އެޓީމުގެ ކޯޗަކަށް ޕޮޗެޓީނޯ ހަމަޖެއްސުމަށެވެ. އެގޮތުން އަހަރަކު 19 މިލިއަން ޕައުންޑުގެ މުސާރައެއް އޭނާ އަށް ހުށަހަޅަން އޮތީ ތައްޔާރަށެވެ. ޕޮޗެޓިނޯ ނުލިބިއްޖެ ހާލަތެއްގައި، އެޓީމުން ދެން ގެންނާނީ ކުރީގެ ކޯޗު ރަފައެލް ބެނިޓޭޒް ކަމަށްވެސް ރިޕޯޓުތައް ބުނެއެވެ. މިހާރު ނިއުކާސަލްގެ ކޯޗަކީ ސްޓީވް ބްރޫސް އެވެ. މި ސީޒަން ނިމެންދެން އޭނާ އެ ޓީމުގައި މަޑުކުރާނެ އެވެ.

ޕޮޗެޓީނޯ އަށް ނިއުކާސަލް ގަންނަން އުޅޭ ވެރިން ފާރަލަމުން އަންނައިރު، ސައުދީގެ އިންވެސްޓަރުންގެ ބޮޑު ހިއްސާއަކާ އެކު 300 މިލިއަން ޕައުންޑަށް ނިއުކާސަލް ގަންނަން މަސައްކަތް ކުރަމުން އަންނަނީ އަމަންޑާ ސްޓަވިލީސްގެ ޕީސީޕީ ކެޕިޓަލް ޕާޓްނާރސް އިންނެވެ. އަމަންޑާއާ އެކު ނިއުކާސަލް ގަތުމުގައި ހިއްސާވަނީ ސައުދީ ވަލީ އަހުދު މުހައްމަދު ބިން ސަލްމާނެވެ. އެގޮތުން ސައުދީ ވަލީ އަހުދު މުހައްމަދު ބިން ސަލްމާނަށް 80 އިންސައްތަ ހިއްސާ ލިބޭއިރު، ބާކީ 20 އިންސައްތަ ބެހިފައި އޮތީ އަމަންޑާ އާއި ރިއުބެން ބްރަދާސްގެ ތެރެއިން ކޮންމެ ބަޔަކަށް %10 ލިބޭ ގޮތަށެވެ.

އެކަމަކު ސައުދީގެ ބަޔަކަށް ނިއުކާސަލް ވިއްކާލުމާ ދެކޮޅަށް އެތައް ބަޔަކު ވަނީ އަޑުއުފާލާފައެވެ.