ކުނަހަންދޫ ގޮނޑުދޮށުން ގަލާއި، ވެލި ނަގާނަމަ ފިޔަވަޅު އަޅާނަން: ކައުންސިލް
ގޮޑުދޮށުން ވެލި ނެގުމަކީ މަނާ ކަމެއް
ލ.ކުނަހަންދޫގެ އެއްވެސް ސަރަހައްދަކުން ގަލާވެލި ނެގުމަކީ މަނާކަމެއް
ލ. ކުނަހަންދޫގެ ގޮޑުދޮށުގެ އެކި ހިސާބުތަކުން ގަލާއި، ވެލި ނެގުމަކީ މަނާ ކަމެއް ކަމަށާއި، އެކަން ކުރާ މީހުންނާ މެދު ފިޔަވަޅު އަޅާނެ ކަމަށް އެރަށުގެ ކައުންސިލުން ބުނެފިއެވެ.
ކުނަހަންދޫ ކައުންސިލުން ބުނީ ކުނަހަންދޫގެ ގޮޑުދޮށުގެ އެކި ހިސާބުތަކުން ގަލާއި، ވެލި ނަގަމުންދާ ކަމުގެ ޝަކުވާތައް ލިބެމުން އަންނަކަމަށެވެ.
ކައުންސިލުން ބުނީ މި ކަމަކީ ތިމާވެށި ހިމާޔަތް ކުރުމުގެ ޤަވާއިދާއި ވެސް ޚިލާފު ޢަމަލެއްކަމަކަށް ވެފައި ރަށަށް ނުހަނު ގެއްލުން ހުރި ކަމެއް ކަމަށެވެ. އަދި ރަށުގެ ތިމާވެށި ހިމާޔަށް ކުރުމަކީ ކޮންމެ ފަރުދެއްގެ ވެސް ޒިންމާއެއް ކަމަށެވެ. ކައުންސިލުން ބުނީ އެރަށުގެ ގޮޑުދޮށުގެ އެއްވެސް ޞަރަޙައްދަކުން ވެއްޔާއި ގައު ނެގުމަކީ މަނާކަމެއް ކަމަށާއި، މީގެ ކުރިން ވެސް މިކަން މަނާކުރެވިފައިވާ ކަމަށެވެ. ނަމަވެސް ޙައްލެއް ނުލިބޭކަން ކައުންސިލުން ފާހަގަކުރިއެވެ.
ކައުންސިލުން ބުނީ ތިމާވެށި ހިމާޔަތްކުރުމުގެ ގަވައިދުގެ 15ވަނަ މާއްދާގެ (ހ) ގައި ބަޔާންކޮއްފައިވާ ގޮތުގެމަތިން ވެއްޔާއި ގައު ނަގާ ފަރާތްތަށް ޖޫރިމަނާ ކުރެވޭނެ ކަމަށެވެ. އެގޮތުން ފުރަތަމަ ފަހަރު ނަޞޭޙަތްތެރިވުމަށްފަހު، އެކަން ތަކުރާރުކޮށްފިނަމަ 500 ރުފިޔާއާ އާއި 1000ރުފިޔާ އާއި ދެމެދުގެ ޢަދަދަކުން ޖޫރިމަނާ ކުރާނެކަމަށެވެ. ތިން ވަނަ ފަހަރު 1000 ރުފިޔާއާ 3000 ރުފިޔާ އާއި ދެމެދު ޢަދަދަކަށް ޖޫރިމަނާ ކުރާއިރު، ހަތަރު ވަނަ ފަހަރު 3000 ރުފިޔާއާ 5000 ރުފިޔާ އާއި ދެމެދު ޖޫރިމަނާ ކުރާނެކަމަށެވެ.
އަދި ފަސްވަނަ ފަހަރުން ފެށިގެން އިތުރުވާ ކޮންމެ ފަހަރަކު 5000 ރުފިޔާއިން ޖޫރިމަނާ ކުރާނެ ކަމަށް ކައުންސިލުން ބުނެއެވެ.
