ކުނަހަންދޫ ސްކޫލާއި ބައެއް ގެތަކުގެ ފުރާޅު އެއްލާލައިފި
ރަށުގެ ހަ ގެއެއްގެ ފުރާޅު ވަނީ އެއްލާލާފައި
ކުނަހަންދޫއަށް ބޮޑު ގެއްލުންތަކެއް ވަނީ ލިބިފައި
ލ. ކުނަހަންދޫއަށް ފަތިހު ކުރި ވިއްސާރައިގައި ސްކޫލުގެ ފުޅާއި ބައެއް ގެތަކުގެ ފުރާޅު އެއްލާލައިފި އެވެ.
އެރަށު ކައުންސިލްގެ ނައިބު ރައީސް ލިރުގާމް ސައީދު ވިދާޅުވީ، އާދިއްތަ ދުވަހުގެ ފަތިހު 04:30 ހާއިރު އައި ކޮޅިގަނޑެއްގައި ސްކޫލުގެ ފުރާޅު އެއްލާލާފައިވާ އިރު ބައެއް ކްލާސް ރޫމްތަކުގައި ފެންބޮޑުވެ، ގޮނޑި މޭޒަށް ގެއްލުންވެފައިވާ ކަމަށެވެ. ހަތަރު ކްލާސް ރޫމެއްގައި ފެންބޮޑުވެފައިވާ އިރު ފުރާޅު އެއްލާލި ބައިގެ ސީލިންގެވެސް ވަރަށް ބޮޑަށް ހަލާކުވެފައިވާ ކަަމަށް ލިރުގާމް ވިދާޅުވި އެވެ. އެހެންވުމުގެ ސަބަބުން ސްކޫލުގެ ކިޔެވުން ނުބާއްވާ ކަމަށް އޭނާ ވިދާޅުވި އެވެ.
އެރަށުގެ ފަސް ގެއެއްގެ ފުރާޅު އެއްލާލާ ހިފާގެންގުޅޭ ސާމާނަށް ގެއްލުން ލިބިފައިވާ ކަމަށް ލިރުގާމް ވިދާޅުވި އެވެ. މިކޮޅިގަނޑުގައި ރަށުގެ ބަނދަރުގައި އޮތް ދެ ލޯންޗު އަޑިއަށް ގޮސްފައިވާ ކަމަށާއި ދެ ލޯންޗުގެ އިންޖީނަށް ބޮޑެތި ގެއްލުންތަކެއް ލިބިފައިވާ ކަމަށް ކައުންސިލުން ބުނެ އެވެ.
ވައިގަދަ ވުމުގެ ސަބަބުން ރުއް ގަސް ވެސް ވެއްޓިފައިވާ އިރު ގާތްގަނޑަކަށް އަށް ރުށް އެ ރަށުން ވެއްޓުނު އިރު ކެޔޮ ދަނޑުތަކަށް ބޮޑެތި ގެއްލުންތަކެއް ލިބިފައިވާ ކަމަށް ލިރުގާމް ވިދާޅުވި އެވެ.
ސްކޫލުގެ ކްލާސް ރޫމް ބަރިއެއްގެ ފުރާޅު އެއްލާލާފައިވާ އިރު ފުރާޅު މަރާމާތު ކުރުމަށް މަސައްކަތް ކައުންސިލުން އިސްނަގައިގެން ކުރަމުންދާ ކަމަށް އެރަށު ކައުންސިލުން ބުނެ އެވެ.
އާދިއްތަ ދުވަހުގެ ފަތިހު 04:30 ފެށިގެން ހެނދުނު 09:00 ޖެހުމާ ހަމައަށް ވާރޭ ވެހުމުގެ ސަބަބުން، ކުނަހަންދޫގައި ފެންބޮޑުވެފައިވާ ކަމަށް ވެސް ކައުންސިލުން ބުނެ އެވެ.ބައެއް ސަރަހައްދުތަކުގައި ދެ ފޫޓަށް ވަނީ ފެންބޮޑުވެފަ އެވެ.
