ކޮމިޓީގެ މަސައްކަތްތަކާއި ގުޅިގެން އާޒިމްގެ ފާޑުކިއުން
އާޒިމް މިހެން ވިދާޅުވީ ސަންސެޓު ބިލުގެ ކޮމެޓީ ރިޕޯޓަށް ބަހުސްކުރައްވަމުން
މެދު ހެންވޭރު ދާއިރާގެ މެމްބަރު އަލީ އާޒިމް
ކޮމެޓީތަކުގެ މަސައްކަތްތައް ކުރިއަށްދާ ގޮތާއި ގުޅޭގޮތުން ސަރުކާރު ހިންގާ މައި ޕާޓީ، އެމްޑީޕީގެ ޕަރލިމެންޓްރީ ގްރޫޕްގެ ލީޑަރު އަލީ އާޒިމް ފާޑުވިދާޅުވެއްޖެ އެވެ.
'ލޯކަލް ކައުންސިލްތަކުގެ އިންތިހާބުގެ ޚާއްސަ ބިލު' ދިރާސާކޮށް ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން އެކުލަވާލި ރިޕޯޓަށް ބަހުސް ކުރައްވަމުން މެދު ހެންވޭރު ދާއިރާގެ މެމްބަރު އާޒިމް ވިދާޅުވީ ކޮމެޓީތަކުން ރިޕޯޓުތައް އެކުލަވާލާއިރު އެކަށީގެންވާ މިންވަރަށް ދިރާސާއެއް ނުކުރެވޭ ކަމަށާއި މަޝްވަރާ ކުރަންޖެހޭ ފަރާތްތަކާއި މަޝްވަރާ ނުކުރާ ކަމަށެވެ. އަދި ރިޕޯޓުތައް މިގޮތަށް ނިންމުމުން އެ ރިޕޯޓަށް އިސްލާހުތަކެއް ހުށަހަޅަން ޖެހޭ ކަން ފާހަގަކުރެއްވި އެވެ.
އެގޮތުން ބުދަ ދުވަހު ހުށަހެޅުނު ކޮމެޓީ ރިޕޯޓަށް ގިނަ އިސްލާހުތަކެއް ހުށަހެޅިގެން ދިޔަކަން ފާހަގަކުރައްވާ އާޒިމް ވިދާޅުވީ އެފަދަ ކަންތައްތަކަކީ ގަބޫލު ކުރެވޭނެ ކަންކަމެއް ނޫން ކަމަށެވެ.
އާޒިމް ވިދާޅުވީ ކޮންމެ ކަމެއްވެސް ކުރަންޖެހޭނީ އެ މަސައްކަތެއް ކުރެވޭނެ އެންމެ ރަނގަޅަކަށް ކަމަށެވެ.
18 ވަނަ ރައްޔިތުންގެ މަޖިލީހުގައި ވެސް، ކޮމެޓީގެ މަސައްކަތްތަކަށް އާޒިމް ފާޑުވިދާޅުވެފައިވެއެވެ. މަޝްވަރާ ކުރަންޖެހޭ ފަރާތްތަކާއި މަޝްވަރާނުކޮށް، އަވަހަށް މަސައްކަތް ނިންމަމުންދާތީ އާޒިމް ވަނީ ފާޑުވިދާޅުވެފަ އެވެ.
