ކޮވިޑް-19 ރޯގާއާއި ގުޅިގެން ވަކި މުއްދަތެއް ނެތްގޮތަށް ފަސްކުރެވިފައިވާ ލޯކަލް ކައުންސިލްތަކުގެ އިންތިޚާބާގުޅޭ ޚާއްޞަ ބިލު، ދިރާސާކޮށް ނިންމިގޮތުގެ ރިޕޯޓަށް ގިނަ އިސްލާހުތަކެއް ހުށަހަޅައިފި އެވެ.

ރައްޔިތުންގެ މަޖިލީހުގެ ބުދަ ދުވަހުގެ ޖަލްސާއަށް ލޯކަލް ކައުންސިލްތަކުގެ އިންތިހާބާގުޅޭ ޚާއްޞަ ބިލް ދިރާސާކޮށް، މަޖިލީހުގެ މިނިވަން މުއައްސަސާތަކާބެހޭ ކޮމެޓީން ނިންމި ގޮތުގެ ރިޕޯޓާމެދު ބަހުސްކ ކުރެއްވުމަށް ގިނަ މެމްބަރުން އެދިލައްވުމާއި އަދި ގިނަ އިސްލާހު ތަކެއް މެމްބަރުން ހުށަހަޅުއްވަމުން ގެންދަވާތީ މަޖިލީހުގެ ރައީސް މުހައްމަދު ނަޝީދު ވަނީ އެރިޕޯޓަށް ބަހުސް ކުރަން ގިނަ މެމްބަރުން އެދިލައްވާތީ، އަދި ގިނަ އިސްލާހުތަކެއް ހުށަހަޅުއްވަމުން ގެންދަވާތީ ބަހުސް ކުރުމަށާއި އިސްލާހު ހުށަހެޅުއްވުމަށް ފުރުސަތު ދެއްވާނެ ކަމަށެވެ.

ދެން ހެއްދެވޭނެ އަނެއް ގޮތެއް ކަމަށް މަޖިލީހުގެ ރައީސް ވިދާޅުވީ، ރިޕޯޓް އަބުނރާ ކޮމެޓީއަށް ދިރާސާ ކުރުމަށް ފޮނުވާލުން ކަމަށެވެ. ނަމަވެސް މަޖިލީހުގެ ރައީސް ވަނީ ބަހުސް ކުރަންވަން ތިއްބެވި މެމްބަރުންނަށް ބަހުސް ކުރުމަށް ފުރުސަތު ދެއްވައި، އަދި އިސްލާހުތައް ވެސް މެމްބަރުންގެ މެދުގައި އެއްގޮތްކުރައްވައިގެން އިސްލާހުތައް ހުށަހެޅުއްވުމަށް އެދިވަޑައިގަންނަވާފަ އެވެ.

ސަރުކާރުންގެ ފަރާތުން މި ބިލް ހުށަހެޅިއިރު، އެއްވެސް ވަރަކަށް ލޯކަލް ކައުންސިލްތަކުގެ އިންތިހާބާއެކު ބާއްވަން ނިންމާފައިވާ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުގެ ވާހަކަ ހިމެނިފައިނުވާތީ، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބާގުޅޭ ކަންކަން ކޮމެޓީން އެބިލް ދިރާސާކޮށް ނިންމި ގޮތުގެ ރިޕޯޓްގައި ހިމަނާފައި ވެއެވެ.

ކޮމެޓީ ރިޕޯޓަށް އިސްލާހު ހުށަހަޅުއްވަމުން ހޯރަފުށި ދާއިރާގެ މެމްބަރު އަހުމަދު ސަލީމު ވިދާޅުވީ، މިގާނޫނަށް އަމަލު ކުރަން ފަށާ ތާރީހުން ފެށިގެން 1 އަހަރުގެ ތެރޭގައި އިންތިހާބު ބާއްވަންޖެހޭނެ ކަމަށް ބުނާއިރު، އިންތިހާބަކާނުލާ 1 އަހަރު ދުވަހުގެ މުއްދަތަށް މިހާރު ތިއްބެވި ކައުންސިލަރުން ތިއްބެވުމުގެ ފުރުސަތު އެބައޮތް ކަމަށެވެ.

އެެހެންކަމުން ސަލީމް ވަނީ، ކޮވިޑް-19 އާގުޅިގެން އިއުލާންކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތު ނިމުމަކަށް ގެންނަތާ 15 ދުވަހުގެ ތެރޭގައި އިލެކްޝަންސް ކޮމިޝަނުން އިންތިހާބު އިއުލާން ކުރަންޖެހޭނެ ކަމަށް ވިދާޅުވެ އިސްލާހެއް ހުށަހަޅުއްވާފަ އެވެ. މި އިސްލާހު ހުށަހަޅުއްވަމުން ސަލީމް ވިދާޅުވީ، މަގްޞަދަކީ މިހާލަތުން އަރައިގަނެ، ވީހާވެސް އަވަހަކަށް އިންތިހާބު ބާއްވައި، އިންތިހާބީ ކައުންސިލަރުންތަކެއް ކަނޑައެޅިގެންދިއުން ކަމަށެވެ. އަދި ސަރުކާރުން ބިލު ހުށަހެޅިއިރު، ހުށަހަޅާފައިވަނީ ވެސް މިހާލަތު ނިމުމާއެކު ވީހާވެސް އަވަހަކަށް އިންތިހާބު ބޭއްވުން ކަމަށެވެ. އަދި އިންތިހާބުގައި ވާދަކުރާ ކެންޑިޑޭޓުން ގިނަ ދުވަސްތަކެއް ވަންދެން މިކަމުގައި އުޅެ، ފާޑަކަށް ބަނދެވިގެންދާދިއުން ނިމުމަކަށް ގެނައުން އަވަސް ކުރުމަށްޓަކައި އިންތިހާބު ބޭއްވޭނެ އެންމެ އަވަސް ތާރީހެއްގައި ބޭއްވުން ވަރަށް މުހިއްމު ކަމަށެވެ.

މީގެއިތުރުން، ސަލީމު ވަނީ، މި ގާނޫނަށް އަމަލު ކުރާއިރު، ސިވިލް ސާރވިސް މުވައްޒަފުންގެ ސަސްޕެންޝަން ބާތިލްވާނެ ކަމަށް ބުނާ މާއްދާއަށް ވެސް އިސްލާހު ހުށަހަޅުއްވާފަ އެވެ. ސަލީހު ހުށަހެޅުއްވު އިސްލާޙުގައި ވަނީ، އިންތިހާބަށް ކުރިމަތިލި މުވައްޒަފުންގެ ސަސްޕެންޝަން ބާތިލްވާ ގޮތަށެވެ. މިއިސްލާހު ހުށަހަޅުއްވަމުން ސަލީމު ވަނީ ވިދާޅުވީ، މިބިލް މިހާރު އޮތްގޮތުން ސަސްޕެންޑް ބާތިލްވަނީ ހަމައެކަނި ސިވިލް ސަރވިސް މުވައްޒަފުން ކަމަށެވެ. ނަމަވެސް އިންތިހާބަށް ކުރިމަތި ލައްވާފައިވާ، ސިވިލް ސާރވިސް ނޫން ވަޒީފާތަކުގައި ތިއްބެވި ކެންޑިޑޭޓުން ވަޒީފާއިން ސަސްޕެންޑް ކޮށްފައިވާ ކަމަށެވެ. އެހެންކަމުން ސަސްޕެންޝަނުގައި ތިބި، ސިވިލް ސާރވިސް މުވައްޒަފުންގެ ހައްގުތައް ރައްކާތެރި ކުރެވޭއިރު، ސަސްޕެންޝަނުގައި ތިއްބެވި އެހެން ކެންޑިޑޭޓުންގެ ހައްގުތައްވެސް ރައްކާތެރި ކުރަންޖެހޭ ކަމަށެވެ.

ސަލީމު ހުށަހެޅުއްވި މި އިސްލާހުގައި ބުނަނީ، ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިހާބުގައި ވާދަކުރާނެ ކެންޑިޑޭޓުން މިދިޔަ މާރޗް މަހުގެ 6 ވަނަ ދުވަހު އިލެކްޝަންސް ކޮމިޝަނުން އިއުލާން ކޮށްފައިވާ ކެންޑިޑޭޓުންގެ ތެރެއިން، ވަޒީފާއިން ސަސްޕެންޑް ކޮށްފައިވާ ކެންޑިޑޭޓުންގެ ސަސްޕެންޝަން މި އޭޕްރީލް މިހުގެ 4 ވަނަ ދުވަހުން ފެށިގެން ބާތިލްވާނެ ކަމަށެވެ.

އޭޕްރީލް މަހުގެ 4 ވަނަ ދުވަސް އައިސްފައިވާ ސަބަބަކީ، އިންތިހާބު ބޭއްވުމަށް އިލެކްޝަންސް ކޮމިޝަނުން އިއުލާނުކުރި ދުވަހަށްވާތީ އެވެ. ކޮވިޑް-19 ރޯގާއާ ގުޅިގެން އިންތިހާބު ބޭއްވުން މިވަނީ ވަކި މުއްދަތެއް ނެތްގޮތަށް ފަސްކުރަން ޖެހިފަ އެވެ.

ސަލީމް ވިދާޅުވީ މިބިލް ފާސްވާ ހިސާބުން، މަދުވެގެން 700 އެއްހާ އާއިލާއަކަށް އުފާވެރި ޚަބަރުތައް ލިބެންދާނެ ކަމަށެވެ.

މިބިލަށް، ސަރުކާރުގެ ފަރާތުން މި ބިލް ހުށަޙެޅުއްވި ތުޅާދޫ ދާއިރާގެ މެމްބަރު ހިސާން ހުސައިންވެސް ވަނީ އިސްލާހުތަކެއް ހުށަހަޅުއްވާފަ އެވެ. އެގޮތުން ލޯކަލް ކައުންސިލްތަކުގެ އިންތިހާބާގުޅޭ އިތުރު ތަފްސީލަކާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބާގުޅޭ އިތުރު ތަފްސީލެކެވެ.

މީގެއިތުރުން ހިސާން ވަނީ، މިހާރު މިބިލް އޮތީ (ރެޓްރޮސްޕެކްޓިވް) ކުރިން ހިނގާފައިވާ ކަމަކަށް މިގާނޫނު ތަސްދީގުވުމާއެކު ހައްލެއް ގެނެވޭ ގޮތަށް ކަމަށްވާތީ އެއީ މަޖިލީހުން އަމަލު ކުރަން އެހާ ރަނގަޅު ގޮތެއް ނޫން ކަމަށެވެ. އެެހެންކަމުން ސަސްޕެންޑް ކުރެވިފައިވާ މުވައްޒަފުންނާމެދު އިޖުރާއަތު ކުރިއަށް ގެންދަންޖެހޭނީ މިގާނޫނު ތަސްދީގުވުމާއެކު ކަމަށް ހިސާން ވިދާޅުވި އެވެ.

ހިސާން ހުށަހެޅުއްވި އިސްލާހުތަކާއި އަދި ސަލީމް ހުށަހެޅުއްވި އިސްލާހުތަކަށް މަޖިލީހުގެ މެމްބަރުން ވަނީ ތާއީދު ކުރައްވާފަ އެވެ.