ކައުންސިލް އިންތިހާބުގެ ޚާއްސަ ބިލާއި ގުޅޭ ކޮމިޓީ ރިޕޯޓު ހުށަހަޅައިފި
އިންތިޚާބު ކުރެވޭ ކައުންސިލަތުން މަޤާމާ ޙަވާލުވުމާއެކު މިޤާނޫނު އުވިގެންދާނެ
ކައުންސިލް އިންތިޚާބުގެ އެމްޑީޕީ ޕްރައިމަރީގެ ތެރެއިން
ކައުންސިލް އިންތިޚާބުގެ ޚާއްޞަ ބިލާއި ގުޅޭ ކޮމިޓީ ރިޕޯޓު މަޖިލީހަށް ހުށަހަޅައިފިއެވެ.
"ލޯކަލް ކައުންސިލްތަކުގެ އިންތިހާބުގެ ޚާއްސަ ބިލު 2020"މިނިވަން މުއައްސަސާތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓަށް ބުދަ ދުވަހު މަޖިލީހަށް ހުށަހެޅުއްވީ ކޮމެޓީގެ މުޤައްރިރު ރޮޒައިނާ އާދަމެވެ.
ބިލުގައި ލޯކަލް ކައުންސިލުތަކުގެ އިންތިޚާބު ލަސްވެގެން ޖެނުއަރީ މަހުގެ 6 ވަނަ ދުވަހު ބާއްވާ ނިންމަންވާނެ ކަމަށް ބަޔާންކޮށްފައިވީ ނަމަވެސް ކޮމެޓީން ވަނީ ލޯކަލް ކައުންސިލުތަކުގެ އިންތިޚާބު 2020 އާއި އަންހެނުންގެ ތަރައްޤީއަށް މަސައްކަތް ކޮމިޓީގެ އިންތިޚާބު، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 1 (އެކެއް) އަހަރު ދުވަހުގެ ތެރޭގައި ބާއްވާގޮތަށް އެ މާއްދާ އިޞްލާޙުކޮށްފައެވެ.
ވަކި ތާރީޚެއްގައި އިންތިޚަބު ބޭއްވުމަށް ބިލުގައި ނުހިމަނާ، މުއްދަތެއް ދީފައިވަނީ އިލެކްޝަން ކޮމިޝަނަށް އިންތިޚާބު ބާއްވާނެ ތާރީޚެއް ކަނޑައެޅުމުގެ ބާރު ދިނުމުގެ ގޮތުން ކަމަށް އައްޑޫ މީދޫ ދާއިރާގެ މެންބަރު ރޮޒައިނާ ވަނީ ވިދާޅުވެފައެވެ.
މީގެއިތުރުން، ލޯކަލް ކައުންސިލްތަކުގެ އިންތިޚާބުގައި ވާދަކުރާނެ ކެންޑިޑޭޓުން ކަމުގައި އިލެކްޝަންސް ކޮމިޝަނުން އިޢުލާނުކޮށްފައިވާ ކެންޑިޑޭޓުންގެ ތެރޭގައި ހިމެނޭ ސިވިލް ސަރވިސްގެ މުވައްޒަފުން ސިވިލް ސަރވިސްގެ ވަޒީފާއިން ސަސްޕެންޑްކޮށްފައި އޮތް އޮތުން އޭޕްރީލް މަހުގެ ތިން ވަނަ ދުވަހުން ފެށިގެން ބާޠިލުވާގޮތަށް ވެސް ރިޕޯޓުގައި ހުށަހަޅާފައިވެއެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބު އެންމެ ފުރަތަމަ ބާއްވަން ހަމަޖެހިފައި އޮތް ތާރީޚަކީ އެޕްރީލް މަހުގެ 4 އެވެ. ނަމަވެސް ފަހުން އިލެކްޝަންސް ކޮމިޝަނުން ވަނީ އިންތިޚާބު ބާއްވާ ތާރީޚު އެޕްރިލް 18 އަށް ބަދަލުކޮށްފައެވެ. އަދި އޭޕްރީލް 18 ގައިވެސް އިންތިޚާބު ނުބޭއްވޭނެކަމަށް ފެންނާތީއާއި އަދި އިންތިޚާބު ބޭއްވޭނެ ވަކިދުވަހެއް ނޭނގޭތީ، ސަރުކާރުން މިބިލު މަޖިލީހަށް ހުށަހެޅުއްވީއެވެ.
ލޯކަލް ކައުންސިލްތަކުގެ އިންތިޚާބު 2020 އިން ހޮވޭ މެންބަރުން މަޤާމާ ހަވާލުވުމުން މިބިލު އުވިގެންދާނެއެވެ.
