މިވަގުތު މޮނިޓަރިންގ ގައި 248 ގެ އަކާއި 22 ރަށެއް
ފިހާރަ، ގޯޑައުން އަދި ކްލިނިކް ތަކަށް ބަލާއިރު 29 ތަނެއް ވަނީ މޮނިޓަރިންގ އަށް ގެނެސްފައި
މާލެ
ކޮވިޑް-19 އާ ގުޅިގެން މިވަގުތު ކަރަންޓީނު އަދި މޮނިޓަރިންގ ގެ ހާލަތުގައި ރާއްޖޭގެ އެކި ހިސާބުތަކުން 248 ގެ އެއްވާ ކަމަށް ހެލްތު ޕްރޮޓެކްޝަން އެޖެންސީން ހާމަކޮށްފި އެވެ.
އެ އެޖެންސީން 29 އޭޕްރީލްގެ ރޭގަނޑު 00:40 އާ ހަމައަށް ކަރަންޓީނު ކޮށްފައިވާ ގެތަކުގެ ތެރޭގައި މާލެ އާއި ރާއްޖޭގެ އެކި ރަށްރަށުގެ ގެތައް ހިމެނެއެވެ. އެގޮތުން 28 އޭޕްރީލްގައި 26 ގެއެއް މޮނިޓަރިންގ ނުވަތަ ކަރަންޓީނަށް ލާފައިވާކަމަށް އެޗްޕީއޭގެ ލިސްޓުން ހާމަވެ އެވެ. މީގެތެރޭގައި ށ އަތޮޅުގެ ރަށްރަށުގެ ގެތައް ގިނައިން ހިމެނޭކަން ފާހަގަވެ އެވެ.
އޭޕްރީލް 28 ވަނަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑޮކްޓަރ އިބްރާހީމް އަފްޒަލް ވަނީ ށ ނަރުދޫން ކޮމިޔުނިޓީ ސްޕްރެޑެއް ފެނިފައިވާކަމަށް ވިދާޅުވެފަ އެވެ. އަދި މިހާތަނަށް އެރަށުން 8 މީހަކު ޕޮޒިޓިވް ވެފައިވާއިރު އެއަތޮޅު މިލަންދޫން ވެސް ވަނީ މީހަކު ކޮވިޑް-19 އަށް ޕޮޒިޓިވްވެފަ އެވެ. މިއީ އަމާޒު ބޯޓުގެ ކެޕްޓަން މިވައިރަސް އަށް ޕޮޒިޓިވްވުމާއި ގުޅިގެން އެކޭސްއާ ގުޅުންހުރި މީހުންކަމަށް އެޗްޕީއޭއިން ވަނީ ބުނެފަ އެވެ.
މޮނިޓަރިންގ ނުވަތަ ކަރަންޓީނު ކުރެވިފައިވާ ފިހާރަ، ގޯޑައުން އަދި ކްލިނިކް ތަކަށް ބަލާއިރު 29 ތަނެއް މިހާރު ލިސްޓުގައި އެބައޮތެވެ. މީގެތެރޭގައި ހިމެނެނީ މާލެ އާއި ހުޅުމާލޭގައި ހުރި ތަންތަނެވެ.
ރާއްޖޭގެ ރަށްރަށަށް ބަލާއިރު 22 ރަށެއް މޮނިޓަރިންގ ހާލަތަށް ވަނީ ގެނެސްފަ އެވެ. އަދި ދެ ބޯޓަކާއި ދޯންޏެއް ކަރަންޓީނުގެ ހާލަތަށް ވަނީ ގެނެސްފަ އެވެ. އެގޮތުން ކާވިޔާ ބޯޓާއި އަމާޒު ބޯޓު އަދި ދަރުމަ ދޯނި ވަނީ ކަރަންޓީނަށް ގެނެސްފަ އެވެ.
ރާއްޖޭގައި މިހާތަނަށް 250 މީހުން ވަނީ ކޮވިޑް-19 އަށް ޕޮޒިޓިވްވެފަ އެވެ.
