130 ފުލުހަކު ކަރަންޓީނުގައި
ސިފައިންގެ 5 މީހަކު ވަނީ ޕޮޒިޓިވްވެފައި
ޓްރެފިކް ޕޮލިހެއް މަގުމަތި ބަލަހައްޓަނީ
މިހާތަނަށް އައިއިރު ފުލުހުންގެ ތެރެއިން 130 މީހަކު ކަރަންޓީނު ކޮށްފައިވާކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ކޮވިޑް-19 އާ ގުޅިގެން އިސް ސަފުގައި ހަރަކާތްތެރިވާ މީހުން ކޮވިޑް-19 ށް އަންނަނީ ޕޮޒިޓިވްވަމުންނެވެ. އެގޮތުން މިހާތަނަށް އައިއިރު ސިފައިންގެ 5 މީހަކު ޕޮޒިޓިވް ވެފައިވާކަމަށް ސިފައިންގެ ކާނަލް ހުސައިން އަލީ ވަނީ ވިދާޅުވެފައެވެ. އެއާގުޅިގެން ކަރަންޓީނު ކުރަންޖެހޭ ފަރާތްތައް ކަރަންޓީނު ކޮށްފައިވާކަމަށްވެސް ކާނަލް ހުސައިން އަލީ ވިދާޅުވެފައި ވެއެވެ. ނަމަވެސް އެއީ ކިހާ އަދަދެއްކަން ހުސައިން އަލީ ހާމައެއް ނުކުރައްވަ އެވެ.
އަންގާރަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަބްރޫކް ވިދާޅުވީ އެކި ކޭސްތަކާއި ގުޅިގެން ހެދިގެންދާ ކޮންޓެކްޓް ޓްރޭސިންގ އާ ގުޅުންހުރި މީހުން ކަރަންޓީނު ކުރަމުންދާ ކަމަށާއި އެގޮތުން މިހާތަނަށް އައިއިރު އެކިއެކި ކޭސްތަކާއި ގުޅުންހުރި 130 ފުލުހަކު ކަރަންޓީނު ކުރެވިފައިވާ ކަމަށް މަބްރޫކް ވިދާޅުވި އެވެ.
ފުލުހުންނާއި ސިފައިންގެ ތެރެއިން 600 ށް ވުރެ ގިނަ މީހުން އެމީހުންގެ އާއިލާ ކައިރިއަށް ނުގޮސް ވަކިތަނެއްގައި ތިބެގެން މިހާރުވެސް މަސައްކަތްކުރަމުންދާ ކަމަށް ޓޫރިޒަމް މިނިސްޓަރ އަލީ ވަހީދު ވަނީ ވިދާޅުވެފަ އެވެ.
ރާއްޖެއިން މިހާތަނަށް 250 މީހަކަށް ކޮވިޑް-19 ޖެހިފައިވާއިރު މިވަގުތާ ހަމައަށް 1271 މީހެއް ވަނީ ކަރަންޓީނުކޮށްފަ އެވެ. އަދި 285 މީހަކު ވަނީ އައިސޮލޭޝަން ފެސިލިޓީތަކުގަ އެވެ.
