ނަފްސާނީ ދުޅަހެޔޮ ކަމަށް އަސަރުކުރުމުގައި ފިރިހެނުންނާއި އަންހެނުންގެ ވަކި ފަރަގެއް ނެތް!
28 އެޕްރީލު 2020 | އަންގާރަ 18:05އަންހެނުން އެހީތެރިކަން އަވަހަށް ހޯދާ
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ޑރ.އާރިފް ވާހަކަ ދައްކަވަނީ
ނަފްސާނީ ދުޅަހެޔޮ ކަމަށް އަސަރުކުރުމުގައި ފިރިހެނުންނާއި އަންހެނުންގެ ވަކި ފަރަގެއް ނެތް ކަމަށް އައިޖީއެމްއެޗްގެ ނަފްސާނީ ބަލިތަކާއި ބެހޭ ޑރ.އާރިފް މުހައްމަދު ވިދާޅުވެއްޖެއެވެ.
އަންގާރަ ދުވަހު ނެޝަނަލް އިމަރޖެންސީ އޮޕަރޭޝަން ސެންޓަރުގައި ވާހަކަ ދައްކަވަމުން ޑރ. އާރިފް ވިދާޅުވީ، ކޮވިޑް-19އާ ގުޅިގެން ނަފްސާނީ އަސަރު ކުރުމުގައި އަންހެނުން ނުވަތަ ފިރިހެނުންނަށް ވަކިން ބޮޑަށް އަސަރު ކުރާ ކަމަށް ނުދައްކާ ކަމަށެވެ.
އަންހެނުން ކަންކަމުގައި އެހީހޯދުން އަވަސްކަން ފާހަގަކުރައްވައި ޑރ.އާރިފް ވިދާޅުވީ ނަފްސާނީ ކަންކަމުގެ އިތުރުން ޖިސްމާނީ ކަންކަމުގައި ފިރިހެނުން އެހީ ހޯދުން ލަސް ކަމަށެވެ.
ޑރ.އާރިފް ނަފްސާނީ މައްސަލަތަކުގެ ވާހަކަ ދެއްކުމަށް މީހުން ޖެހެލުންވާ ކަމަށާއި، ޚާއްސަކޮށް ފިރިހެނުން މިވާހަކަތައް ހިއްސާކުރުމަށް ޖެހެލުންވާ ކަމަށެވެ. ނަމަވެސް އިންސާނުންނަށް ވީތީ މިކަންކަމުގައި ކުރިމަތިލައި ޑޮކްޓަރުންގެ އެހީ ހޯދުމަށް ޑރ.އާރިފް އިލްތިމާސްކުރެއްވިއެވެ. އަދި ވިދާޅުވީ ސިއްރު ކުރުމަކީ ހައްލު ނޫން ކަމަށާއި، އެކަންކަމުގެ ވާހަކަ ދެއްކުމަކީ ވެސް އެހީ އެއް ކަމަށެވެ.
ކޮވިޑް-19 ފެތުރި އެންމެން ހާސްވެފައިވާ މިދަނޑިވަޅުގައި އާންމުންގެ ތެރޭގައި ނަފްސާނީ މައްސަލަތައް އިތުރުވެފައިވާކަން ފާހަގަކުރައްވައި ޑރ.އާރިފް ވިދާޅުވީ މިދިޔަ މަހު އެކަނި ވެސް ނަފްސާނީ މައްސަލަތަކާ ގުޅިގެން 715 މީހަކަށް އައިޖީއެމްއެޗުން ފަރުވާ ދީފައިވާ ކަމަށާއި އެއީ މިދިޔަ އަހަރުގެ އެ މުއްދަތާ އަޅާ ބަލާއިރު ދެ ގުނަ އިތުރު އަދަދެއްް ކަމަށެވެ. އަދި ކުރިއަށް އޮތް ތަނުގައި މި އަދަދުތައް އިތުރުވާނެކަން ޑރ އާރިފް ފާހަގަކުރެއްވިއެވެ.
