މަޖިލީހުން ބަޔާން ނެރުނުތާ 19 މިނިޓު ތެރޭގައި ހެލްތް މިނިސްޓަރ ޖަވާބުދާރީވެއްޖެ
28 އެޕްރީލު 2020 | އަންގާރަ 16:15މިހާތަނަށް ވެންޓިލޭޓަރުތައް ލިބިފައި ނުވަނީ ކީއްވެތޯ އޮޅުންފިލުވައި ދެއްވުމަށް ހުށައެޅުއްވި
ހެލްތް މިނިސްޓަރ އަބްދުﷲ އަމީން
މައްޗަންގޮޅި ދެކުނު ދާއިރާގެ މެންބަރު ޢަހްމަދު ޚައިތަމް މިނިސްޓަރ އޮފް ހެލްތް ޢަބްދުالله އަމީންގެ އަރިހުން ލިޔުމުން ޖަވާބު ހޯއްދެވުމަށް ފޮުނުއްވި ސުވާލަށް ޖަވާބު ފޮނުއްވާފައިނުވާތީ ރައްޔިތުންގެ މަޖިލީހުން ބަޔާން ނެރުނުތާ 19 މިނިޓު ތެރޭގައި މިނިސްޓަރ ޖަވާބުދާރީ ވެވަޑައިގެންފިއެވެ.
މިކަމާއި ގުޅިގެން ރައްޔިތުންގެ މަޖިލީހުގެ ޑިރެކްޓަރ އޮފް މީޑިއާ ކޮމިއުނިކޭޝަންސް ހަސަން ޒިޔާއު ވިދާޅުވީ، މައްޗަންގޮޅި ދެކުނު ދާއިރާގެ މެންބަރު ޢަހްމަދު ޚައިތަމް މިނިސްޓަރ އޮފް ހެލްތް ޢަބްދުالله އަމީންގެ އަރިހުން ލިޔުމުން ޖަވާބު ހޯއްދެވުމަށް ފޮނުއްވި ސުވާލުގެ ޖަވާބު މިއަދުގެ އިރުއޮއްސި 6:31 ގައި މަޖިލީހުގެ އިދާރާއަށް އީމެއިލް މެދުވެރިކޮށް ލިބިފައިވާކަމަށެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ރައްޔިތުންގެ މަޖިލީހުގެ ގަވާއިދާ މިނިސްޓަރ އޮފް ހެލްތް ޢަބްދުﷲ އަމީން ޚިލާފުވެޑައިގެންފައިވާކަމަށް މަޖިލީހުން ބަޔާން ނެރުނީ 6:12 ގައެވެ.
ބަޔާނުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 93 ވަނަ މާއްދާއާއި، ރައްޔިތުންގެ މަޖިލީހުގެ ގަވާއިދުގެ 80 ވަނަ މާއްދާގެ ދަށުން، ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެންބަރު އަޙްމަދު ޚައިތަމް، މިނިސްޓަރ އޮފް ހެލްތް ޢަބްދުﷲ އަމީންގެ އަރިހުން ލިޔުމުން ޖަވާބު ހޯއްދެވުމަށް ފޮނުއްވާފައިވާ ސުވާލު ނޯޓިސް 14 އެޕްރީލް 2020 ގައި، މިނިސްޓަރ އޮފް ހެލްތް ޢަބްދުﷲ އަމީނަށް ފޮނުވާފައިވާ ކަމަށެވެ. އަދި މި ސުވާލު ނޯޓިސްއަށް ޖަވާބުދެއްވުމަށް މިނިސްޓަރ އޮފް ހެލްތް ޢަބްދުﷲ އަމީންއަށް ރައްޔިތުންގެ މަޖިލީހުގެ ގަވާއިދުގެ 74 ވަނަ މާއްދާގެ ދަށުން އެރުވުނު 14 ދުވަހުގެ ނޯޓިހުގެ މުއްދަތު 27 އެޕްރީލް 2020 ގެނިޔަލަށް ހަމަވެ، ޖަވާބުދެއްވުމަށް އަންގާރަ ދުވަހުގެ މެންދުރު 2:00 ގެ ނިޔަލަށް އެ މަނިކުފާނަށް އެރުވިފައިވާ މުއްދަތު ހަމަވިއިރުވެސް ޖަވާބު ފޮނުއްވާފައިނުވާ ކަމަށެވެ.
