މިފަހަރުގެ ރަމަޟާން މަސް މި ދިމާވީ ގިނަ ޞަރަޙައްދުތަކަކައް ފުރަބަންދު ދުވަސްވަރަކާއެވެ. މިދުވަސްވަރު ބޭނުންވާނީ ފަސޭހައިން ލިބެން ހުންނަ ތަކެތި ނޫނީ ގޭގައި ހުރި އެއްޗެއް ބޭނުންކޮށްލައިގެން ތައްޔާރު ކޮށްލެވޭނެ ރެސިޕީ އެކެވެ. މި ރެސިޕީއަށް އަމިއްލައަށް ލޯފް ޕޭނެއްގައި ޕާނެއް ފިހެލުމުން ބޭނުން ބޯމިނަކަށް ކަފާލެވޭނެއެވެ. އެހެންނަމަވެސް އަވަހަށް ހަދާލަން ބޭނުންވާނަމަ ބޭކަރީއަކުން ޕާނެއް ގަނެލައިގެން މި ރެސިޕީ ތައްޔާރުކޮށްލެވިދާނެއެވެ.

ދަމާފައި ހުރި ޕާންފޮތި ތަކުގައި ތުނިކޮށް މާޖިރިންކޮޅެއް ހާކާލާށެވެ.

ފިޔާ، މިރުސް، ހިކަނދިފަތް އަދި ލޮނުމެދު ކޮޅު ހިމުންކޮށް ކޮށާލާށެވެ.

ދެން ތެއްޔަކަށް މަސްދަޅުގައި ހުރި ތެޔޮ އަޅާފައި، ތަރުކާރީކޮޅު މީރުކޮށްލާށެވެ. ތަރުކާރީކޮޅު މީރުވުމުން ދަޅުގައި ހުރި މަސް އެއްކޮށްލުމަށްފަހު ހާވާލާށެވެ.

ދެން ކެރެޓު ހިމުންކޮށް ގާނާފައި ބޭކްޑް ބީންސްއާއެކު ތެއްޔަށް އެއްކޮށްލާށެވެ.

ކެރެޓުކޮޅު އެއްވުމުން މަސްޓަޑް، ޕޭސްޓް އަދި ސޯސް އަޅާފައި ރަނގަޅަށް އެއްކޮށްލާށެވެ.

އެންމެ ފަހުން ލޮނާއި, ދިރި އަދި އަސޭމިރުސް އެއްކޮށްލާ ރަނގަޅަށް އެއްކޮށްލާށެވެ.

މަސްގަނޑު ނިމުމުން، ތައްޔާރުކޮށްފައި ހުރި ޕާން ފޮތި ތަކުގެ އެއްފަރާތަށް ރޮނގެއްހެން ފަތުރާލާފައި، ޕާންފޮތި އޮޅާލާށެވެ.

ފިހަންވީމައި ބިހުގެ ގޮބޮޅިބައި ވަކިކޮށް، ގިރާލާފައި ޕާން ރޯލް ތަކު މަތީގައި ހާކާފައި، ރޯލްތަށް ޓޯސްޓް ވެލަންދެން އަވަނުގައި ފިހެލާށެވެ.