ކުރިއަށް އޮތް ހަފުތާތެރޭގައި "ކޮވިޑް ވިލެޖް" ގެ މަސައްކަތް ނިންމާލެވޭނެ: ކާނަލް ހުސައިން
28 އެޕްރީލު 2020 | އަންގާރަ 09:50ސިފައިން ހުރިހާ ދިމާލެއްގައި ދަނީ މަސައްކަތް ކުރަމުން
ހޯމަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން، ކާނަލް ހުސައިން އަލީ
ހުޅުމާލޭގައި ޤާއިމުކުރާ ''ކޮވިޑް ވިލެޖް'' ކުރިއަށް އޮތް ހަފުތާ ތެރޭގައި ނިންމާލުމަށް މަސައްކަތް ކުރަމުންދާ ކަމަށް ކާނަލް ހުސައިން އަލީ ވިދާޅުވެއްޖެއެވެ.
ކޮވިޑް-19 މިޙާލަތުގައި ކުރެވެމުންދާ މަސައްކަތްތަކާ ބެހޭ ގޮތުން މަޢުލޫމާތު ދިނުމަށް ހޯމަ ދުވަހު ބޭއްވި ނޫސްވެރިން ބައްދަލުވުމުގައި ކާނަލް ހުސެއިން ވިދާޅުވީ މިއީ ވަރަށް ނާޒުކު ދަނޑިވަޅެއް ކަމަށާއި، ސިފައިން ހުރިހާ ދިމާލެއްގައި މަސައްކަތް ކުރަމުންދާ ކަމަށެވެ.
ކާނަލް ހުސެއިން ވިދާޅުވީ ކޮވިޑް-19އަށް ފިސިލީޓިތައް މެނޭޖްކުރުމާއި، ފެސިލިޓީތައް ޤާއިމުކުރުމުގެ މަސައްކަތްތަކުގައި ސިފައިން އިސް ދައުރެއް އަދާ ކުރާކަމަށެވެ. އެގޮތުން ފަރުކޮޅުފުށީގައި ޤާއި،ު ކުރެވުނު ފެސިލިޓީއާ، ހުޅުމާލެ ފޭސް-2 ގައި ބިދޭސީ މަސައްކަތްތެރިން ބައިތިއްބަން ހަދާ ފެސިލިޓީ ކާނަލް ހުސެއިން ފާހަގަކުރެއްވިއެވެ.
ކާނަލް ހުސެއިން ވިދާޅުވީ މިހާރު ވެސް ވެލިދޫ އައިސޮލޭޝަން، ކަރަންޓީން ފެސިލިޓީއެއްގެ ގޮތުގައި ޤާއިމުކުރުމުގެ މަސައްކަތްކުރަމުން އަންނަ ކަމަށެވެ. އަދި ކުރިއަށް އޮތް ދެދުވަހުގެ ތެރޭގައި އެތަނުގެ ކެޕޭސިޓީ ވަރަށް ބޮޑަށް ފުޅާ ވެގެންދާނެ ކަމަށެވެ. މީގެ އިތުރުން ކާނަލް ހުސެއިން ވިދާޅުވީ ގުޅީފަޅުގައި ވެސް ފެސިލިޓީއެއް ޤާއިމުކުރުމުގެ މަސައްކަތްތައް ކުރަމުންދާ ކަމަށް ވިދާޅުވިއެވެ.
ހުޅުމާލޭގައި ގާއިމްކުރެވޭ ކޮވިޑް ވިލޭޖަށް އަލިއަޅުއްވާލައްވާ ކާނަލް ހުސެއިން ވިދާޅުވީ އެތަނުގެ މަސައްކަތް ވަރަށް ބާރު ސްޕީޑްގައި ކުރިއަށްދާ ކަމަށާއި، އުންމީދަކީ ކުރިއަށް އޮތް 06 ދުވަހެއްގެ ތެރޭގައި މަސައްކަތް ކޮށް ނިންމާލުން ކަމަށެވެ.
ހުޅުމާލޭގައި ޤާއިމުކުރެވޭ ކޮވިޑް ވިލޭޖްއަކީ ކޮވިޑް-19 އަށް ޕޮޒިޓިވްވެ ޙާލު ބޮޑުވާ ބަލި މީހުންނަށް ފަރުވާ ދިނުމަށް 300 އެނދާއެކު، ވެންޓިލޭޓަރުގެ ޚިދުމަތް ދެވޭ ގޮތަށް ޤާއިމު ކުރާ ވިލޭޖެކެވެ.
އެތަނުގައި ޚާއްޞަ އެހީއަށް ބޭނުންވާ ބަލިމީހުން ބަލަހައްޓާނެ ތަނެއްވެސް ހުންނާނެއެވެ. އަދި ގިނަ ޢަދަދެއްގެ ވެންޓިލޭޓަރު އެނދުވެސް އެތަނުގައި އޮޕަރޭޓް ކުރަމުންދާނެއެވެ.
