ޓޮޓެންހަމް ހޮޓްސްޕާގެ ކުޅުންތެރިންނަށް އެކުލަބުގެ ޓްރެއިނިންގ ސެންޓަރުގައި އެކަނި ތަމްރީނުތައް ހަދަން ފުރުސަތު ދީފިއެވެ.
ކޮރޯނާވައިރަސް (ކޮވިޑް-19) އާ ގުޅިގެން އިނގިރޭސި ޕްރިމިއާ ލީގު މުއްދަތެއް ނެތް ގޮތަށް މެދުކަނޑާލާފައިވާއިރު، ކުލަބްތަކުން ވަނީ ތަމްރީނުތައް ވެސް ހުއްޓާލާފައެވެ. އަލުން ލީގު ފަށާނެ ތާރީޚެއް އަދި ކަނޑައަޅާފައި ނުވި ނަމަވެސް، ޓޮޓެންހަމުން ވަނީ އަންގާރަ ދުވަހުން ފެށިގެން އެ ކުލަބުގެ ޓްރެއިނިންގ ސެންޓަރުގައި ކުޅުންތެރިންނަށް އެކަނި ތަމްރީނުތައް ހެދުމުގެ ފުރުސަތު ހުޅުވާލާފައެވެ.
ޓޮޓެންހަމުން ބުނީ ޓްރެއިނިންގ ސެންޓަރަށް ކުޅުންތެރިންނަށް ވަނުމުގެ ހުއްދަ ދޭނީ ވަކި އަދަދަކަށް ކަމަށާއި އެކަން ވަރަށް ރަނގަޅަށް ބަލާނެ ކަމަށެވެ. އަދި ސެންޓަރުގައި އުޅޭއިރު އިޖުތިމާއީ ގައިދުރުކަމުގެ ގަވާއިދަށް ހުރިހާ ވަގުތެއްގައި ވެސް އަމަލުކުރަން ޖެހޭނެ ކަމަށް ވަނީ ބުނެފައެވެ.
ޓޮޓެންހަމްގެ ކުޅުންތެރިންނަށް އެ ކުލަބުގެ ޓްރެއިނިން ސެންޓަރުގައި އެކަނި ތަމްރީނުތައް ހެދުމުގެ ފުރުސަތު ދިންއިރު، މީގެ ކުރިން އެ ކުލަބުގެ ކޯޗު ހޯސޭ މޮރީނިއޯ އާއި ބައެއް ކުޅުންތެރިންގެ ފަރާތުން އިޖުތިމާއީ ގައިދުރުކަމުގެ ގަވާއިދާ ޚިލާފު އަމަލުތައް ވަނީ ފެނިފައެވެ. އެކަމަށް މޮރީނިއޯ އާއި ކުޅުންތެރިން މާފަށް އެދިފައިވާއިރު، ޓޮޓެންހަމުން ވަނީ އެޓީމުގެ ހުރިހާ ކުޅުންތެރިންނަށް ގަވާއިދުތަކަށް ބޯލެނބުމަށް ނަސޭހަތް ދީފައެވެ.
ޓޮޓެންހަމްގެ އިތުރުން ކުޅުންތެރިންނަށް އެކަނި ތަމްރީނުތައް ހަދަން ފުރުސަތު ހުޅުވާލާފައިވަނީ އާސެނަލާއި ބްރައިޓަން އަދި ވެސްޓް ހޭމް ޔުނައިޓެޑުންނެވެ.
