މާލެ ސިޓީގައި ކޮވިޑް-19 ފެތުރިފައި އޮތް މިންވަރު ދެނެގަތުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ފަށާފައިވާ ކޮމިއުނިޓީ ސްޕްރެޑް ސަރވޭގެ ތެރެއިން އާދިއްތަ ދުވަހު މާލޭގެ އެކި ސަރަހައްދުން 25 ސާމްޕަލް ނަގައިފި އެވެ.
ހޯމަ ދުވަހުގެރޭ ނެޝަނަލް އިމަރޖެންސީ ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް ވިދާޅުވީ، ރެންޑަމް ސާމްޕަލް ނަގަމުންދަނީ ބާޒާރު މަތީ ފިހާރަތަކުންގެ އިތުރުން ކަންމަތީ ފިހާރަތަކުންނާއި، ފެރީތަކުން ކަމަށެވެ. އަދި ވިލިމާލޭގެ އިތުރުން ހުޅުމާލެއިން ވެސް ސާމްޕަލް ނެގުމަށް ވަނީ ހަމަޖެހިފަ އެވެ.
މާލެއިން އެންމެ ފުރަތަމަ ކޮވިޑް-19 ގެ ކޭސް އެއް ފެނިފައިވަނީ މި މަހުގެ 15 ވަނަ ދުވަހު އެވެ. އޭގެ ފަހުން ކޭސްތަކުގެ އަދަދު ދަނީ ދުވަހެއް ދުވަހަކަށް ގިނަވަމުންނެވެ.
މީގެ ކުރިން ބޭއްވި ޕްރެސްކޮންފަރެންސް ގައި ޓެކްނިކަލް އެޑްވައިޒަރީ ގްރޫޕް (ޓެގް) އިން ބުނެފައިވާ ގޮތުން މާލެއިން ފުރަތަމަ ކޭސް އެއް ފެނުމުގެ ތިން ހަފްތާއެއް ކުރިން އާއްމުންގެ ތެރޭގައި ބަލި ފެތުރެން ފަށާފައިވާ ކަމަށެވެ. އަދި ބަލި ފެނިފައިވަނީ ކޮމިއުނިޓީ ސްޕްރެޑެއް އޮތްތޯ ބެލުމުގެ ގޮތުން ސަރވޭއެއް ފަށާފައި ވަނިކޮށެވެ.
