ބަލި ޖެހުނު އިތުރު ދެ މީހަކު ދަރުމަވަންތަ ހޮސްޕިޓަލުގައި އެޑްމިޓްކޮށްފި
27 އެޕްރީލު 2020 | ހޯމަ 16:56ޕާކިސްތާންގެ މީހެއްވެސް ވަނީ އެޑްމިޓްކޮށްފައި
ދަރުމަވަންތަ ހޮސްޕިޓަލް
ބަލި ޖެހުނު އިތުރު ދެ މީހަކު ދަރުމަވަންތަ ހޮސްޕިޓަލުގައި އެޑްމިޓްކޮށްފައިވާކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.
ހޯމަ ދުވަހުގެ ރޭ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. އިބްރާހިމް އަފްޒަލް ވިދާޅުވީ ދަރުމަވަންތަ ހޮސްޕިޓަލުގައި އެޑްމިޓްކޮށްގެން ތިން މީހަކަށް ފަރުވާދެމުން އަންނަކަމާއި ހުރިހާ އެންމެންގެ ހާލު ރަނގަޅުކަމަށެވެ.
އިތުރަށް ތަފްސީލްކޮށްދެއްވަމުން، ޓެކްނިކަލް އެޑްވައިޒަރީ ގްރޫޕުގައި ވެސް ހިމެނިވަޑައިގަންނަވާ ޑރ. އަފްޒަލް ވިދާޅުވީ އެ ތިން މީހުންގެ ތެރޭގައި ހިމެނެނީ، ކުރިންވެސް ޑީއެޗް11 ގައި ފަރުވާދެމުން އައި 81 އަހަރުގެ މީހާއާއި 68 އަހަރުގެ ދިވެހި އަންހެނަކާއި ޕާކިއްސާތަނަށް ނިސްބަތްވާ 48 އަހަރުގެ ފިރިހެންކަމަށެވެ. އެގޮތުން ދިވެހި ދެމީޙުންގެ ހާލު ރަނގަޅުކަމަށާއި ޕާކިސްތާނު މީހާ އެޑްމިޓްކުރެވުނީ، އޮކްސިޖެން ބޭނުންވެގެންކަމަށް ޑރ ވަނީ ވިދާޅުވެފައެވެ.
ކޮވިޑް-19 އަކީ ނޭވާލާ ނިޒާމުގެ ބައްޔަކަށްވާއިރު، އެހެން ބަލިތައް ޖެހޭ މީހުންނަށް ވުރެ މި ބަލިޖެހޭ މީހުންނަށް އޮކްސިޖަން ފޯރުކޮށްދޭން ޖެހޭ މިންވަރު އިތުރެވެ. އެގޮތުން ކޮވިޑް-19 ގެ ބަލި މީހުންގެ ތެރެެއިން ގިނަ މީހުންނަށް މިނިޓެއްގެ ތެރޭގައި 15 ލީޓަރާއި 30 ލީޓަރުގެ އޮކްސިޖަން ފޯރުކޮށްދޭން ޖެހެއެވެ. ރާއްޖޭގެ ސިއްހީ މަރުކަޒުތަކާއި ހޮސްޕިޓަލުގައި ބޭނުންކުރަނީ އޮކްސިޖަން ސިލިންޑަރެެވެ.
ކޮވިޑް-19 އަށް ފަރުވާދޭ ހަތަރު ހޮސްޕިޓަލް ކަމަށްވާ، އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)، ދަރުމަވަންތަ، އޭޑީކޭގެ އިތުރުން ޓްރީޓޮޕް ހޮސްޕިޓަލުގައި ދެމުންދާ އޮކްސިޖަން އަކީ، އޮކްސްިޖަން އުފައްދާ މެޝިން ބޭނުންކޮށްގެން އުފައްދާ އޮކްސިޖަންއެވެ.
