ކޮވިޑް-19 ގެ ބަލިމަޑު ކަމުގެ ސަބަބުން ރިސޯޓުތަކުގައި ތާށިވެފައި ތިބި ސްޓާފުންނަށް ރަށަށް ދެވޭނެ އިންތިޒާމުތައް ހަމަޖައްސައިދިނުމަށް މަސައްކަތް ކުރަމުންދާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.

ކޮވިޑް-19 ގެ ހާލަތާއި ގުޅިގެން ގިނަ އަދަދެއްގެ ރިސޯޓް މުވައްޒަފުންތަކެއް ރިސޯޓްތަކުގައި ތާށިވެފައިތިބި އިރު މާލެ ލޮކްޑައުން ވުމާއި ގުޅިގެން މާލޭގައި ގިނަ އަދަދެއްގެ ރިސޯޓް މުވައްޒަފުން ވަނީ ތާށިވެފަ އެވެ. އަދި އެމީހުންނަށް ރަށަށްދެވޭނެ އިންތިޒާމުތައް ހަމަޖެހިފައި ނުވާތީ އެކަމުގެ ޝަކުވާތައް އެމީހުން އަންނަނީ ކުރަމުންނެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓަރ އަލީ ވަހީދު ވިދާޅުވީ އެފަދަ މީހުން ރަށަށް ފޮނުވުމުގެ އިންތިޒާމުތައް ހަމަޖައްސަމުން ގެންދަވާ ކަމަށެވެ.

މިނިސްޓަރ ވިދާޅުވީ މިކަމުގައި މިހާރު މަސައްކަތް ކުރައްވަމުން ގެންދަވަނީ ރިސޯޓްތަކުގެ މުވައްޒަފުން މާލެ ނުގެނެސް އެމީހުންގެ ރަށަށް ފޮނުވާލުމާއި ގުޅޭގޮތުން ކަމަށެވެ. އެންމެ މުވައްޒަފަކު ނަމަވެސް ރިސޯޓެއްގައި ހުރި ނަމަ ޚާއްސަ ސަމާލުކަމެއް ދީގެން އެކަން ކުރަމުން ގެންދަވާ ކަމަށް އަލީ ވަހީދު ވިދާޅުވި އެވެ. މީގެއިތުރުން ކުރެއްދޫގައި ތިބި ހުރިހާ ސްޓާފުންގެ ޓެސްޓްތައް ނިމެނުންދާކަމަށް އަލީ ވަހީދު ވިދާޅުވި އެވެ.

މީގެ ކުރިން ރިސޯޓުން ފޭބޭ ގޮތަށް އޮތީ އެންމެ ފަހު ޓޫރިސްޓު ފައިބާތާ 14 ދުވަސް ފަހުންނެވެ. އެހެން ނަމަވެސް މާލެއިން ކޮވިޑް-19 ފެނުމާއެކު ފަހުން ރާއްޖޭގެ އެއްވެސް ރަށަކުން އެހެން ރަށަކަށް ދަތުރު ނުކެރެވޭ ގޮތަށް ޑިރެކްޓާ ޖެނެރަލް އޮފް ޕަބްލިކް ހެލްތު ވަނީ އެންގުމެއް ނެރެފަ އެވެ. އަދި މާލެ ސިޓީ ސަރަހައްދު ވަނީ ލޮކްޑައުން ކޮށްފަ އެވެ.