ފްރަންޓްލައިން ގައި މަސައްކަތް ކުރާ މީހުންގެ ރައްކާތެރިކަމަށް މާލެ ސަރަހައްދުގެ ގެސްޓް ހައުސްތައް ދަނީ ހަމަޖައްސަމުން
27 އެޕްރީލު 2020 | ހޯމަ 12:44މިހާރުވެސް އެމީހުން ދިރިއުޅޭ ގޭގެއަށް ނުގޮސް 600 ށް ވުރެ ގިނަ މީހުން މަސައްކަތް ކުރަމުންދޭ
މާލެ
ރާއްޖޭގައި މިހާރު ފެތުރެމުންދާ ކޮވިޑް-19 އާ ގުޅިގެން އިސް ސަފުގައި މަސައްކަތް ކުރަމުންދާ މީހުންގެ ތެރެއިން މިހާރުވެސް އެމީހުން ދިރިއުޅޭ ގޭގެއަށް ނުގޮސް 600 ށް ވުރެ ގިނަ މީހުން މަސައްކަތް ކުރަމުންދާ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެ އެވެ.
ހޯމަ ދުވަހު ކުރިޔަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ މީގެތެރޭގައި ފުލުހުންނާއި ސިފައިން ހިމެނޭކަމަށް އަލީ ވަހީދު ވިދާޅުވި އެވެ. ރާއްޖޭގައި ފްރަންޓްލައިންގައި މަސައްކަތްކުރާ މީހުންގެ ތެރެއިން ކޮވިޑް-19 ޖެހިފައިވާ ސިފައިންގެ 5 މީހުން މިހާރު ތިބިއިރު އެމީހުންނާއި ގުޅުންހުރި ސިފައިންގެ މީހުން މިހާރުވެސް ވަނީ ކަރަންޓީނު ފެސިލިޓީތަކަށް ގެންގޮސްފަ އެވެ.
އެހެންކަމުން ފްރަންޓްލައިނުގައި މަސައްކަތްކުރާ މީހުންގެ ފަރާތުން އެމީހުންގެ އާއިލާއާ ހަމައަށް ވައިރަސް ދިޔަނުދިިނުމަށްޓަކައި އެފަދަ ހާލަތެއް ދިމާވެއްޖެނަމަ އެމީހުން ބައިތިއްބާނެ ތަންތަން މާލެ ތެރެއިން ހޯދަމުންދާ ކަމަށް އަލީ ވަހީދު ވިދާޅުވި އެވެ.
ހޯމަ ދުވަހުގެ ނޫސްވެރިންގެ ބައްދަލުވުމުގައި އަލީ ވަހީދު ތަކުރާރުކޮށް ވިދާޅުވީ ފްރަންޓްލައިން ގައި މަސައްކަތްކުރާ މީހުންވެސް ކޮވިޑް-19 އަށް ޕޮޒިޓިވްވެދާނެ ކަމަށް ވިސްނައިގެން މަސައްކަތްތައް ރާވައިގެން ކުރިޔަށް ގެންދާކަމަށެވެ. އެގޮތުން އެމީހުން މިވައިރަސް އަށް ޕޮޒިޓިވްވެ އަދި ކަރަންޓީނަށްވެސް ގިނަ އަދަދެއްގެ ބަޔަކު ދާނެކަމަށް ބަލައިގެން މަސައްކަތްތައް ކުރަމުންދާ ކަމަށް އަލީ ވަހީދު ވިދާޅުވި އެވެ.
