ކަރަންޓީނު ފެސިލިޓީތައް މެނޭޖްކުރުމުގައި ކޮރަޕްޝަނުގެ އަމަލެއް ހިންގާފައެއް ނޯންނާނެ: ޓޫރިޒަމް މިނިސްޓަރ
27 އެޕްރީލު 2020 | ހޯމަ 10:57ކޮރަޕްޝަނަށް އިނގިލި ދިއްކުރެވޭނެ އެއްވެސް ޖާގައެއް ނޯންނާނެ
ޓޫރިޒަމް މިނިސްޓަރު އަލީ ވަހީދު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާއެކު
ކޮވިޑް-19އާ ގުޅިގެން ކަރަންޓީނު ފެސިލިޓީތައް މެނޭޖުކުރުމުގައި ކޮރަޕްޝަނުގެ އެއްވެސް ޢަމަލެއް ހިންގާފައިނުވާނެކަމަށް ޓޫރިޒަމް މިނިސްޓަރު ޢަލީ ވަހީދު ވިދާޅުވެއްޖެއެވެ.
ކޮވިޑް-19ގެ އެންމެފަހުގެ މަޢުލޫމާތު ހިއްސާ ކުރުމަށް ހޯމަ ދުވަހުގެ މެންދުރުފަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޢަލީ ވަހީދު ވިދާޅުވީ މިކަމާ ގުޅިގެން ސަރުކާރުގެ އިންޓަރނަލް އޮޑިޓްތައްވެސް ކުރިއަށް ގެންދާކަމަށެވެ. އަދި ކަރަންޓީން ފެސިލިޓީތައް މެނޭޖް ކުރުމުގައި ކޮރަޕްޝަނަށް އިނގިލި ދިއްކުރެވޭނެ އެއްވެސް ޖާގައެއް ނޯންނާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ޢަލީ ވަހީދު ވިދާޅުވީ ޤާނޫނާއި، ޤަވާއިދުގެ ތެރެއިން ފެސިލިޓީތައް ނެގިފައިވާ ގޮތާއި އަދި ޚަރަދުކުރާ ގޮތް ލިޔެ ކިއުމުން ފެންނަން ހުންނާނެކަމަށެވެ.
ކޮރަޕްޝަނުގެ އެއްވެސް ޢަމަލެއް ނުހިނގާކަމުގެ ޔަޤީންކަން މިނިސްޓަރު ޢަލީ ވަޙީދު ދެއްވާފައި މިވަނީ ކަރަންޓީން ފެސިލިޓީތައް ޚަރަދުކޮށްވައިފައި ވަނީ ނުބައްދަލު އަގުތަކެއް ބުނެ، ބައެއް މީހުން ގެންދަނީ ސަރުކާރަށް ވަރަށް ބޮޑެތި ތުހުމަތުތަކެއް ކުރަމުންދާ ދަނޑިވަޅެއްގައެވެ.
