ޗައިނާއިން ރާއްޖޭގައި 1100 މީހުންގެ ޖާގައިގެ ކަރަންޓީނު ދެ ފެސިލިޓީ ހަދަނީ
27 އެޕްރީލު 2020 | ހޯމަ 07:15ޗައިނާގެ ސްޓޭޓް ކޮންސްޓްރަކްޝަނުން 100 މީހުން ކަރަންޓީނު ފެސިލިޓީއެއް ހެދުމަށް ރާއްޖެއަށް ފޮނުވުމަށް ވަނީ ނިންމާފައި
ޗައިނާގެ ކުންފުންޏެއްގެ މުވައްޒަފުން މަސައްކަތް ކުރަނީ
ޗައިނާގެ ދެ ކުންފުންޏަކުން ރާއްޖޭގައި ކަރަންޓީނު ދެ ފެސިލިޓީ އެއް ހެދުމުގެ މަސައްކަތް ފަށާފައިވާކަމަށް ޗައިނާއިން ރާއްޖެއިން ކަޑައަޅުއްވާފައި ހުންނަވާ ސަފީރު ޖަންގް ލިޖޮންގް ވިދާޅުވެއްޖެއެވެ.
ސަފީރު ކުރެއްވި ޓްވީޓެއްގައި ވިދާޅުވެފައި ވަނީ ދިވެހި ސަރުކާރުގެ އެދުމުގެ މަތިން ޗައިނާގެ ސްޓޭޓް ކޮންސްޓްރަކްޝަނުން 100 މީހުން ކަރަންޓީނު ފެސިލިޓީއެއް ހެދުމަށް ރާއްޖެއަށް ފޮނުވުމަށް ނިންމާފައިވާކަމަށެވެ. އަދި މިމީހުންނާއެކު މިތަން ހެދުމަށް ބޭނުންވާ ސާމާނާއި އިކުއިޕްމަންޓްވެސް ގެންނާނެކަމަށް ސަފީރު ވިދާޅުވިއެވެ. މިއީ 800 މީހުންގެ ޖާގަ ހިމެނޭ ވަގުތީ ކަރަންޓީނު ފެސިލިޓީއެކެވެ.
ޗައިނާ ސަފީރު ދެން ކުރައްވާފައިވާ ޓްވީޓްގައި ވިދާޅުވެފައިވަނީ ބެއިޖީން އަރބަން ކޮންސްޓްރަކްޝަން ގްރޫޕް (ބީޔޫސީޖީ) ގެ ފަރާތުން ހުޅުމާލޭގައި ދެބުރިއަށް ހަދާފައިވާ ޢިމާރާތެއް ރެނޮވޭޓް ކުރުމުގެ މަސައްކަތް ކުރުމަށް ނިންމާފައިވާކަމަށެވެ. އެމަސައްކަތުގައި 40 މީހުން އުޅޭނެކަމަށް ސަފީރު ވިދާޅުވިއެވެ. މިއީ 327 މީހުންގެ ޖާގައިގެ ކަރަންޓީނު ފެސިލިޓީ އެކެވެ.
އިތުރު ކަރަންޓީނު ފެސިލިޓީތައް ހެދުމުގެ މަސައްކަތްތައް ކުރަމުންދާއިރު ދާދިފަހުން ހެލްތު މިނިސްޓަރ ޢަބްދުﷲ އަމީން ވަނީ ކުރިއަށް އޮތްތާނގައި ބަލި ޖެހިފައިވާ މީހުންގެ ޢަދަދު އިތުރުވެ، އެކަހެރި ކުރަންޖެހޭ މީހުން އިތުރުވާނެތީ، ގޭގައި ކަރަންޓީނު ކުރަން ޖެހިދާނެކަމަށާއި އެކަމަށް ތައްޔާރުވެ ތިބުމަށް އިލްތިމާސް ކުރައްވާފައެވެ.
މިހާތަނަށް 214 މީހަކު ރާއްޖެއިން ވަނީ ޕޮޒިޓިވްވެފައެވެ. އަދި ޕޮޒިޓިވް ކޭސްތަކާ ގުޅޭ 2000 އަށްވުރެ ގިނަ ކޮންޓެކްޓުން ވަނީ ހޯދައިފައެވެ.
