ކުރެއްދޫ އައިލެންޑް ރިސޯޓުގައި ތިބި އެންމެން ކޮވިޑް-19 އަށް ޓެސްޓުކުރާނެ ކަމަށާއި، މިހާރު ސާންޕަލް ނަގާ ނިމިފައިވާ ކަމަށް ޓާސްކްފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

އާދިއްތަ ދުވަހުގެ ރޭ ކޮވިޑް-19 ގެ އެންމެފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ކުރެއްދޫގައި ތިބި އެންމެ ކޮވިޑް-19އަށް ޓެސްޓު ކުރުމަށް ނިންމީ ކުރެއްދޫ ކޭސް އެހެން ކޭސްތަކާ ތަފާތު ވުމުން ކަމަށެވެ. އަދި ކުރެއްދޫގައި ތިބި ހުރިހާ ސްޓާފުންގެ ސާންޕަލްތައް ނަގާ މިހާރު ނިމިފައިވާ ކަމަށެވެ.

ކުރެއްދޫއިން ނެގިފައިވާ ސާންޕަލްތަކުގެ ތެރެއިން 173 ސާންޕަލްއެއްގެ ނަތީޖާ ލިބިފައިވާ ކަމަށާއި، އެސާންޕަލްތަކުގެ ނަތީޖާ ނެގެެޓިވް ކަމަށް މަބްރޫކް ވިދާޅުވިއެވެ. އަދި ވިދާޅުވީ ވާކީ ހުރި ސާންޕަލްތައް ޓެސްޓު ކުރުމުގެ މަސައްކަތްތައް ކުރިއަށްދާ ކަމަށެވެ.

ކުރެއްދޫގައި ތިބި އެންމެން ދޫކޮށްލަން ނިންމާފައިވަނީ ކޮވިޑް-19 އަށް ޓެސްޓުކުރުމަށް ފަހުކަމަށްވާއިރު، އެ ރިސޯޓުން ފުރައިގެން ދިޔަ އިޓަލީ ފަތުރުވެރިޔާ މައްސަލައިގެ ޖިނާއީ ތަހުގީގު ފުލުހުން ވަނީ ފަށާފައެވެ.

މިމައްސަލައާ ގުޅިގެން ކުރެއްދޫ އައިލެންޑް ރިސޯޓުގައި މަސައްކަތް ކުރާ ޑޮކްޓަރުގެ ޕާސްޕޯޓް ހިފަހައްޓަން މޯލްޑިވްސް ޕޮލިސް ސަރވިސް އިން އިމިގްރޭޝަނަށް ވަނީ ޢަމުރުކޮށްފަ އެވެ.

ކްރިމިނަލް ކޯޓުގެ ގާޒީ އިބްރާހިމް އަލީ ސޮއިކުރައްވާ ނެރުއްވާފައިވާ ކޯޓު ޢަމުރުގައި ބުނެފައިވަނީ، މި އަހަރުގެ ފެބްރުއަރީ މަހުގެ 23 ވަނަ ދުވަހުގެ ވަގުތެއްގައި ކުރެއްދޫ ރިސޯޓް އެންޑް ސްޕާގައި ޗުއްޓީ ހޭދަކުރި އިޓަލީގެ ފަތުރުވެރިއެއްގެ ގައިން ބައްޔަށް ޝައްކުކުރެވޭ ޢަލާމާތްތަކެއް ފެނިފައިވާއިރު، އެ ފަތުރުވެރިޔާ ގައިގައި ބަލި ހުރިކަން ދެނެނުގަނެވި އަދި ރައްކާތެރިކަމުގެ ފިޔަވަޅުތައް އެޅުމުގެ ފުރުޞަތު ނުލިބި އޭނާ ފުރައިގެން ގޮސްފައިވުމާއި، އެކަމުގެ ސަބަބުން ކޮވިޑް-19 ވައިރަސް ދިވެހިރާއްޖޭގައި ފެތުރިފައިވާ ކަމަށެވެ.

އިތުރު ފަރާތްތަކުގެ ޞިއްޙަތަށާއި، ފުރާނައަށް ނުރައްކާ ކުރިމަތިލުމުގައި އިޓަލީގެ ފަތުރުވެރިޔާ އެކި ގޮތްގޮތުން މުޢާމަލާތްކުރި ފަރާތްތަކުން އެކަން އަންގަންޖެހޭ ފަރާތްތަކަށް ނާންގާ އަޅަންޖެހޭ ފިޔަވަޅުތައް ނާޅާ ފަރުވާ ކުޑަކޮށް ޢަމަލުކޮށް އިހުމާލުވެފައިވާ ކަމަށް އޭނާގެ މައްޗަށް ތުހުމަތު ކުރެވޭކަމަށެވެ.